Qazaqstannyń Bas sanıtar dárigeri Erlan Qıasov qazaqstandyqtarǵa eskertý aıtty. Bul týraly mınıstrliktiń resmı saıty habarlady.

– Sońǵy kúnderi Nur-Sultan jáne Almaty qalalarynda epıdemıologıalyq jaǵdaıdyń nasharlaýy baıqalatyny ózderińizge belgili. Keshe eldiń eki iri megapolısinde COVID-19-ben syrqattanýshylyq el boıynsha anyqtalǵan barlyq jaǵdaılardyń 55%-yn qurady.

Koronavırýs ınfeksıasyn juqtyrý qaýpiniń joǵary bolýy qoǵamdyq oryndarǵa, saýda ortalyqtaryna, bazarlarǵa barýmen, buqaralyq is-sharalardy (úılený toılary, mereıtoılar, eske alý jáne t.b.) ótkizýmen, qoǵamdyq kólikte aldyn alý sharalaryn saqtamaýmen, sondaı-aq úı karantınin saqtamaýmen baılanysty, – dedi bas sanıtar dáriger.

Erlan Qıasovtyń aıtýynsha, Nur-Sultan jáne Almaty qalalarynda koronavırýstyń odan ári taralýynyń aldyn alý maqsatynda óńirlik jedel shtabtardyń sheshimi boıynsha birqatar shekteý sharalary qabyldandy.

Sondaı-aq ol aldaǵy mereke, demalys kúnderi densaýlyǵymyzdy jáne jaqyndaryńyzdyń densaýlyǵyn saqtaýǵa shaqyryp, mynadaı keńester berdi:

• Almaty jáne Nur-Sultan qalalaryna barýdan bas tartý;
• halyq kóp jınalatyn oryndarǵa barmaý, mereke kúnderin jaqyn adamdardyń arasynda ótkizý;
• qonaq shaqyrýdan jáne qonaqqa barýdan bas tartý;
• jiti respıratorlyq ınfeksıalarmen aýyratyn adamdarmen tyǵyz baılanysta bolmaý;
• áleýmettik qashyqtyqty, maska kıý rejımin saqtaý;
• shetelge barýdan bas tartý.