Qazaqstannyń tuńǵysh prezıdenti Nursultan Nazarbaev qazaqstandyqtardy Naýryz meıramymen quttyqtady. Bul týraly elbasy.kz saıty habarlady.

"Sizderdi ulystyń uly kúni – Naýryz meıramymen quttyqtaımyn! 

Kóktemgi kún men túnniń teńelýi – búkil qazaqstandyqtar asyǵa kútetin jáne erekshe atap ótetin aıtýly mereke. Halqymyzdyń uly mádenıeti, baı salt-dástúri kórinis tapqan Naýryz meıramy Qazaqstanda turatyn barlyq etnos ókilderin uıystyrady.

Táýelsizdik jyldary bul mereke el birliginiń jarqyn sımvolyna aınaldy. Ol tatýlyq, turaqtylyq  jáne ultaralyq kelisim memleketimizdiń úılesimdi damýynyń irgetasy ári zor jeńisteriniń kepili ekenin aıǵaqtaıdy. Biz Táýelsizdiktiń osy negizgi qundylyqtaryn kózdiń qarashyǵyndaı saqtap, ári qaraı nyǵaıtýǵa tıispiz. Qazaqstandyqtar bul mindetti abyroımen atqaryp kele jatyr. Aldaǵy ýaqytta da solaı bolaryna kámil senemin.

Osy shýaqty merekede otanymyz – Qazaqstan Respýblıkasyna shyn júrekten tynyshtyq pen baq-bereke tileımin. Árdaıym shańyraqtaryńyzdan yrys pen yntymaq, ıgilik pen molshylyq ketpesin! Ulys oń bolsyn, aq mol bolsyn!" delingen habarlamada.