Ulybrıtanıanyń qupıa ólimdi zertteıtin resmı ókili Qazaqstannyń burynǵy prezıdenti Nursultan Nazarbaevtyń jıen nemeresi Aısultan Nazarbaevtyń qazasyna esirtkige táýeldilik sebep boldy degen qorytyndy jasady, dep jazady Azattyq radıosy.

Zertteý nátıjesi 24 naýryzda jarıalandy. Onyń nátıjesi burynǵy prezıdenttiń nemeresiniń qazasy tóńiregindegi túrli kúdik-dúdámaldardy seıiltedi dep aıtylady. Aısultan 2020 jyly 16 tamyzda Londondaǵy saıabaqtan essiz kúıde tabylǵan edi. Keıinirek onyń qaıtys bolǵany jaıly habar tarady.

Aısultan Nazarbaev jyldar boıy esirtkige táýeldilikpen kúresken. Ol sonymen birge óziniń otbasyn birneshe ret jemqorlyq úshin aıyptaǵan. Bul onyń qazasyna baılanysty túrli joramaldardyń týyndaýyna sebep bolǵan edi.

Saraptama kezinde aǵa koroner Fıona Ýılkoks oqıǵany esirtkimen baılanysty dep sıpattaǵan kýágerler, polısıa qyzmetkerleri jáne pısqıatrdyń sózderimen kelisken.

"Aısultan tabıǵı sebeppen qaıtys boldy dep sanaımyn; ol kokaınǵa táýeldiliktiń nátıjesinde qaıtys boldy" dedi Ýılkoks tyńdaý qorytyndysy kezinde.