Almatydaǵy Shoqan Ýálıhanov atyndaǵy alańda Demokratıalyq partıa bastamashyl toby men onyń jaqtastarynyń Qytaı ekspansıasyna qarsy mıtıńi bastaldy.

Mıtıńke Almaty ákimdigi ruhsat bergen. Alaıda oqıǵa ornynda júrgen Qamshy tilshileri alańdy arnaıy jasaq pen polısıa qyzmetkerleri Dostyq jáne Qonaev kósheleri jaǵynan jaýyp tastaǵanyn, alańda ınternet istemeıtinin, 4 adamdy avtozagqa salyp alyp ketkenin aıtady.

Demokratıalyq partıa bastamashyl tobynyń jetekshisi Janbolat Mamaı Qamshy tilshisine budan bólek taǵy 6 adamdy ustaǵanyn jetkizgen.

Janbolat Mamaı ustalǵan jaqtastaryna arasha túspek bolǵanymen, arnaıy jasaq ókilderi oǵan mursat bermegen. Bul jaǵdaıǵa pikir bildirgen ol "zańdy mıtıń bola tura bılik zańsyzdyqqa baryp otyr" deıdi.

Mıtıńke shyqqandardyń qoldaryndaǵy plakattarda "Qytaı elshisi elshi me, jaýshy ma?", "Úkimet Qazaqstandy saýdaǵa salmaq", "Qytaı ekspansıasyna jol joq", "Qytaı, jerimizge kóz salma", "Jerińdi qorǵamasań, "jer" bolasyń", "Qytaı ekspansıasy táýelsizdikten aıyrý", "Jer satylmaıdy, jalǵa berilmeıdi", "Sańyraý prezıdent kerek emes", "Ultaraqtaı bolsa da, ataqonys jer qymbat" dep jazylǵan.

Osy kúni sheteldegi oppozısıoner Muhtar Áblázov ta jaqtastaryn birneshe qalada mıtıńke shyǵýǵa shaqyrǵan. Almatydaǵy mıtıń orny retinde ol da Shoqan Ýálıhanov atyndaǵy alańdy belgilegen.

Dempartıa belsendisi Dáýren Dostıarov alańda 400-ge jýyq jaqtastarynyń júrgenin aıtady. Sondaı-aq ol alańǵa kele jatqan belsendilerdiń jolda ustalǵany týraly habar jetip jatqanyn jetkizdi.

Qamshy tilshisi de bul jolǵy mıtıńke buǵan deıingi aksıalarǵa qaraǵanda kóp adamnyń jınalǵanyn baıqaǵan.

Oqı otyryńyz:

♦ Almatydaǵy mıtıń. Narazy topqa belgili opozısıalyq jýrnalıser qosyldy

♦ Janbolat Mamaı: Qazaq jerinde Qytaıdyń 56 zaýytynyń qurylysyn júrgizýge qarsymyz!