Almatydaǵy Shoqan Ýálıhanov atyndaǵy alańda ótip jatqan Demokratıalyq partıa bastamashyl toby jaqtastarynyń mıtıńine opozısıalyq jýrnalıser Ermurat Bapı men Rysbek Sársenbaı da keldi.

Mıtıńte sóz alǵan Ermurat Bapı bılikke qarsy áreketterde halyqtyń qoly bıliktiń jaǵasyna jetetindeı jaǵdaıda bolýy kerek ekenin aıtty.

– Halyqtyń eki qolyna bir kúrek bolatyndaı jumys joq. Endi eki aıaǵymyzdy basyp turatyn jerimizdi de ózimizge qaldyrmaıyn dep jatyr. Jer máselesine qatysty jalpyhalyqtyq qozǵalys uıymdastyrý kerek. Buǵan barlyq uıymdar qatysýy kerek. Qazaqtyń jeriniń máselesi jalpyhalyqtyq másele, bizdiń erteńgi bolashaǵymyzdyń máselesi. Jalpyhalyqtyq mıtıń jasaǵanda ǵana jerimizdi qorǵap qala alamyz, – dedi ol.

Jýrnalıs Rysbek Sársenbaı Qazaqstannyń eks-prezıdenti Nursultan Nazarbaev ta, qazirgi prezıdent Qasym-Jomart Toqaev bergen ýádelerin oryndamaǵanyna nazar aýdardy.

– Búgin el, jerdi, táýelsizdikti qorǵamasaq, erteń kesh bolady. Bulaı jalǵasa berse, jerden de, elden de aıyrylamyz. Nazarbaev pen Toqaev 500 myń adamdy jumyspen qamtıtyndaryn, 1200 kásiporyn salatyndaryn aıtqan. Sol ýádeleri qaıda? Qaıda sol kásiporyndar? Sol 1200 kásiporyn búginde jumys istep tursa, Qytaıdyń 56 zaýytyna kúnimiz qarap qalar ma edi, – deıdi jýrnalıs.

Mıtıń ótip jatqan aýmaqta áli de ınternet istemeıdi.

Mıtıńke shyqqandardyń qoldaryndaǵy plakattarda "Qytaı elshisi elshi me, jaýshy ma?", "Úkimet Qazaqstandy saýdaǵa salmaq", "Qytaı ekspansıasyna jol joq", "Qytaı, jerimizge kóz salma", "Jerińdi qorǵamasań, "jer" bolasyń", "Qytaı ekspansıasy táýelsizdikten aıyrý", "Jer satylmaıdy, jalǵa berilmeıdi", "Sańyraý prezıdent kerek emes", "Ultaraqtaı bolsa da, ataqonys jer qymbat" dep jazylǵan.

Osy kúni sheteldegi oppozısıoner Muhtar Áblázov ta jaqtastaryn birneshe qalada mıtıńke shyǵýǵa shaqyrǵan. Almatydaǵy mıtıń orny retinde ol da Shoqan Ýálıhanov atyndaǵy alańdy belgilegen.

Dempartıa belsendisi Dáýren Dostıarov alańda 400-ge jýyq jaqtastarynyń júrgenin aıtady. Sondaı-aq ol alańǵa kele jatqan belsendilerdiń jolda ustalǵany týraly habar jetip jatqanyn jetkizdi.

Qamshy tilshisi de bul jolǵy mıtıńke buǵan deıingi aksıalarǵa qaraǵanda kóp adamnyń jınalǵanyn baıqaǵan.