Almatydaǵy Shoqan Ýálıhanov atyndaǵy alańda ótken Demokratıalyq partıa bastamashyl toby jaqtastarynyń Qazaqstanda Qytaı zaýyttarynyń salynýyna qarsy ótkizgen ruhsat etilgen mıtıńi aıaqtaldy.

Mıtıńke 400-ge jýyq adam qatysty. Aksıa barysynda tirkelmegen Dempartıa jaqtastarynan bólek opozısıalyq jýrnalıser Ermurat Bapı men Rysbek Sársenbaı, belsendi Gúljan Erǵalıeva sóz sóıledi,

Narazylyq aksıasy kezinde Qamshy tilshileri 4 adamdy avtozagqa salyp alyp ketkenin kórgen. Demokratıalyq partıa bastamashyl tobynyń jetekshisi Janbolat Mamaı budan bólek taǵy 6 adamdy ustaǵanyn aıtty. Dempartıa belsendisi Dáýren Dostıarov alańǵa kele jatqan belsendilerdiń jolda ustalǵany týraly estip jatqandaryn habarlady.

Mıtıńke shyqqandardyń qoldaryndaǵy plakattarda "Qytaı elshisi elshi me, jaýshy ma?", "Úkimet Qazaqstandy saýdaǵa salmaq", "Qytaı ekspansıasyna jol joq", "Qytaı, jerimizge kóz salma", "Jerińdi qorǵamasań, "jer" bolasyń", "Qytaı ekspansıasy táýelsizdikten aıyrý", "Jer satylmaıdy, jalǵa berilmeıdi", "Sańyraý prezıdent kerek emes", "Ultaraqtaı bolsa da, ataqonys jer qymbat" dep jazylǵan.

Mıtıń sońynda Demokratıalyq partıa bastamashyl tobynyń jetekshisi Janbolat Mamaı tómendegideı talaptaryn qoıdy.

1. Qazaqstanda Qytaıdyń 56 zaýytynyń qurylysyn júrgizýge qarsymyz;

2. Qytaıdan memleketimiz qansha qaryz aldy, ne úshin aldy, sony bılik ashyq jarıalasyn;

3. Qytaımen qandaıda bir ekonomıkalyq sharttar qoǵam talqylaýynsyz qabyldanbaýǵa tıis;

4. Qytaıdan jumysshylar keltirilmesin. Barlyq jumysty Qazaqstannyń azamattary atqarýy tıis;

5. Jer sheteldikterge jalǵa berilmeıdi, satylmaıdy degen sózdi Konstıtýsıaǵa engizý kerek;

6. Jer máselesin bılik taǵaıyndaǵan komısıa músheleri emes, shynaıy táýelsiz kúshter qaraýǵa tıis;

7. Bılikten barlyq saıası tutqyndardy bosatyp, olardy qýdalaýdy doǵarýdy talap etemiz;

8. Qazaqstanda saıası partıalar týraly, saılaý týraly zań qabyldanyp, opozısıalyq uıymdar tirkeýden ótýge tıis!