Túrkitildes elderdiń beıresmı samıtinde prezıdent Qasym-Jomart Toqaev Túrkistan óńirinde túrki elderiniń birlesken "Arnaıy ekonomıkalyq aımaǵyn" qurýdy usyndy. 

– Pandemıa buryn-sońdy bolmaǵan ekonomıkalyq daǵdarysqa ákep soqtyrdy. İndettiń saldarynan ózara saýda aınalymy azaıyp ketti. Naqty aıtqanda, Qazaqstan men Túrki keńesine múshe elder arasyndaǵy saýda-sattyq kólemi byltyr shamamen 7 mıllıard dollar boldy. Bul – pandemıaǵa deıingi kórsetkishten 11,2 paıyzǵa tómen. Sondyqtan, bizdiń elderimiz úshin alys-beristi ulǵaıta túsý – basty mindettiń biri. Osy oraıda, toǵyz joldyń torabynda ornalasqan Túrkistannyń ınvestısıalyq jáne saýda-ekonomıkalyq múmkindigi zor. Onyń qomaqty tabıǵı resýrsyn, adamı kapıtaly men týrısik áleýetin eskerip, Túrkistan óńirinde túrki elderiniń birlesken "Arnaıy ekonomıkalyq aımaǵyn" qurýdy usynamyn, – dedi ol.

Sonymen qatar prezıdent transshekaralyq sý resýrstaryn tıimdi paıdalaný – el turaqtylyǵy men ósip-órkendeýiniń kepili ekenin aıtty. Osy oraıda, samıtke qatysýshy eldermen birlese gıdroqurylymdar salý jobalaryna atsalysýǵa daıyn ekenin atap ótti.