İndetti toqtatýdyń birden-bir joly – azamattarymyzdy vaksınamen jappaı qamtamasyz etý. Bul týraly prezıdent Qasym-Jomart Toqaev túrkitildes memleketterdiń beıresmı samıtinde aıtty.

– Byltyrdan beri búkil álem teńdessiz syn-qaterlermen kúresip keledi. Soǵan qaramastan, túrkitildes memleketterdiń yntymaqtastyǵy jalpy alǵanda báseńdegen joq. Búgingi otyrys – sonyń dáleli. Alaıda kúrdeli kezeńde qarym-qatynasymyzǵa tyń serpin berý joldaryn birlesip oılastyrýymyz qajet, – dedi prezıdent.

Ol osy maqsatta basa nazar aýdarý kerek máselelerdi aıtty.

– İndetti toqtatýdyń birden-bir joly – azamattarymyzdy vaksınamen jappaı qamtamasyz etý ekeni aıdan anyq. Bizdiń elderimiz de ekpe shyǵarýdy qolǵa aldy. Ortaq múddege saı tájirıbe bólisip, bir-birimizdi qoldaýymyz qajet dep sanaımyn.

Ókinishke qaraı, halyqaralyq qaýymdastyq pandemıaǵa qarsy kúres kezinde tutasyp áreket ete almady. Negizgi iri memleketter arasynda qaıshylyqtar týyndap, vaksınalyq qaqtyǵys bastalyp ketti. Birikken Ulttar Uıymy da osyndaı kúrdeli jaǵdaıda óz áleýetin kórsete almady, – dedi Toqaev.

Onyń aıtýynsha, bıologıalyq qaýipsizdik jónindegi halyqaralyq agenttik qurý týraly bastama bolashaqta bıologıalyq qaterdiń aldyn alýǵa múmkindik beredi.

– Osy kúrdeli kezeńde densaýlyq saqtaý jáne bıoqaýipsizdik máselesiniń mańyzy arta tústi. Bul rette Birikken Ulttar Uıymy Bas Assambleıasynyń 75-shi sesıasynda Qazaqstan bıologıalyq qaýipsizdik jónindegi halyqaralyq agenttik qurý týraly bastama kótergeni belgili. Sizder osy tyń ıdeıany qoldaısyzdar dep senemin. Agenttik bolashaqta bıologıalyq qaterdiń aldyn alýǵa jáne qaýipti dert boıynsha málimet almasýǵa múmkindik bereri sózsiz, – dedi ol.