Almaty qalasy sanıtarıalyq-epıdemıologıalyq baqylaý departamentiniń basshysy, qalanyń bas sanıtar dárigeri Jandarbek Bekshın qaladaǵy epıdahýal týraly baıandady.

– Qazirgi ahýal kúrdeli. Biraq qystan beri jasaǵan daıyndyǵymyz qazirgi jaǵdaıdan ótýge múmkindik berip otyr. Búginde 7 011 tósek-oryn bar. Bos tósek-oryn sany 44,9 paıyz (2 520 oryn). Jansaqtaý bólimindegi tósek-oryndardyń 62 paıyzy bos. Sondyqtan barlyq jaǵdaı Qoǵamdyq densaýlyq saqtaý uıymynyń qolynda, másele kúndelikti baqylaýda. Alańdatatyn problema joq. Sebebi bári aýrýhanaǵa der kezinde jatqyzylyp jatyr. Olardyń sany 250-270 shamasynda, 500-ge jetken joq. Sondyqtan qazirgi tańda lokdaýn, qalany jabý degen áńgime joq, – dedi ol. 

Sondaı-aq Bekshın Ramazan aıy qarsańynda turǵyndarǵa úndeý jasady.

– Biz qasıetti Ramazan aıynyń qarsańynda úndeý joldap jatyrmyz. Esterińizde me, byltyr aýyzashar kezinde koronavırýs ınfeksıasyn juqtyrǵandardyń sany artqan bolatyn. Osyny eskerip bıylǵy Ramazan aıynda bizdiń azamattarymyz ujymdyq is-sharalardy, sonyń ishinde úıge qonaq shaqyrýdy azaıtýlaryn suraımyz, – dedi bas sanıtar dáriger.