Til maıdany qozǵalysy Nur-Sultan qalasyndaǵy dúkenderdiń birinde qazaq tilinde qyzmet kórsetýdi suraǵan qarıany kúzetshi "arandatýshysyń" dep ıterip jibergenin habarlady.
Jarıalanǵan vıdeodan qarıanyń "men qashan myna jerde memlekettik tilde qyzmet alam, aıtyńyzshy? Siz nege meni qýasyz? Qazaqstanda qazaqsha sóıleýge bolmaı ma?", "meni kúzetshi arandatýshysyń dep ıterip jiberdi, ózi bir sóz (qazaqsha - red) bilmeıdi, myna jerde qalaı jumys jasaıdy, meni nege ıteredi" degen ashynǵan daýsy estiledi.
Qamshy portalyna pikir bildirgen Til maıdany qozǵalysynyń jetekshisi Qýat Ahmetov vıdeony Baıtas esimdi kózi 10 paıyzǵa ǵana kóretin elorda turǵyny túsirgenin jetkizdi.
Onyń aıtýynsha, qarıa dúkenge sút satyp alýǵa kirgen. Qazaqsha qyzmet kórsetýin suraǵanynda kúzetshi "arandatýshysyń" dep ıterip jibergendikten, yzalanyp telefonynyń kamerasyn qosyp, jaǵdaıdy vıdeoǵa túsire bastaǵan.
Qýat Ahmetov Qazaqstanda qazaqsha sóıleıtin azamattardyń tutynýshy retindegi quqyǵy jıi buzylatynyn aıtyp, qozǵalys sondaı oqıǵalarǵa tap bolǵan azamattarǵa quqyqtyq turǵydan qoldaý bildiretinin málim etti. Sózinshe, qozǵalys qazaqsha qyzmet kórsetpegen memlekettik, memlekettik emes uıymdardy, kásipkerlik nysandardy sotqa berip, jábirlenýshilerdiń quqyǵyn qorǵaýmen aınalysady.
Qazaqsha qyzmet ala almaı, dıskrımınasıaǵa ushyraǵan azamattar bolsa, qozǵalystyń whatsapp nomeri – 8707 404 66 48-ge habarlasýǵa bolady.
Oqı otyryńyz:
Pikir qaldyrý