Premer-mınıstr Asqar Mamın jumys isteıtin jastar úshin jalǵa beriletin páterler qurylysyn qarjylandyrýdy 2025 jylǵa deıin uzartý qarastyrylyp jatqanyn málim etti. Bul týraly ol Aq jol partıasynyń depýtattyq saýalyna joldaǵan jaýabynda aıtty.
Mamınniń aıtýynsha, 2019-2020 jyldary respýblıkalyq mańyzy bar Nur-Sultan, Almaty, Shymkent qalalarynda jumys isteıtin jastarǵa 4 myń páter jalǵa berilgen.
"Qazirgi ýaqytta Indýstrıa jáne ınfraqurylymdyq damý mınıstrligi bıyl 3 myń páter berý máselesin pysyqtaýda. Sondaı-aq, atalǵan baǵdarlamaǵa 2025 jylǵa deıin qarjylandyrýdy uzartý bóliginde ózgerister engizý jumystary júrgizilýde. 2021-2025 jyldary "Nur Otan" partıasynyń saılaýaldy baǵdarlamasyna sáıkes jyl saıyn respýblıkalyq mańyzy bar qalalarda 3 myń jasty osyndaı turǵyn úımen qamtamasyz etý josparlanýda. 2025 jylǵa qaraı jumys isteıtin jastarǵa barlyǵy 15 myń páter beriletin bolady. Múddeli memlekettik organdar tarapynan bul baǵytta tıisti jumystar júrgizilýde jáne olar Úkimettiń baqylaýynda" delingen Asqar Mamınniń Aq jol partıasy depýtattarynyń saýalyna joldaǵan jaýabynda.
2019 jyly respýblıkalyq mańyzy bar qalalardyń 29 jasqa deıingi jastaryna páterler satyp alý quqyǵynsyz jalǵa berile bastady. Baǵdarlamaǵa sáıkes, Nur-Sultan, Almaty, Shymkent qalalarynan jyl saıyn 1000 páter berý kózdelgen. Páterlerdiń aı saıynǵy jaldaý aqysy komýnaldyq qyzmet aqysyn qospaǵanda 5 myń men 12 myń teńge aralyǵynda.
Baǵdarlamaǵa 29 jasqa tolmaǵan, sońǵy eki jylda páter alǵysy keletin qalada tirkeýde turǵan, jalaqysy 40 AEK-ten asatyn (2021 j. - 116 680 tg) asatyn, bankte depozıti bar, ótinish tapsyrýshy men jubaıynyń atynda úıi joq azamattar qatysa alady.
Ótinish berýshilerdiń tizimi upaı júıesin (eń kópupaı sany boıynsha) esepke alý arqyly jasalady.
Pikir qaldyrý