Almaty oblysy Kegen aýdany Shyrǵanaq aýylynyń turǵyndary jańa taǵaıyndalǵan ákimdi "qabyldamaımyz" dep narazylyq bildirýde. Aıtýlarynsha, 5 sáýir kúngi aýyl ákiminiń saılaýy ádil ótpegen, saılaý nátıjesi zańsyz. Sonymen qatar "Jergilikti ózin-ózi basqarý týraly" zańnyń 36-baby buzyldy dep ashynady. Qamshy tilshisi máseleniń mán-jaıyn bilip qaıtty.

Roza Batyrhanova, Shyrǵanaq aýyly analar keńesiniń tóraıymy:

"Elbasynyń 2017 jylǵy ákim saılaýy jónindegi 91-jarlyqtyń, 36-baby boıynsha aýyl ákimderin aýdany ákimi usynady. Usynǵan kandıdattar qoǵamdyq keńestiń kelisimimen bekitiledi. Hattama toltyrylady. Bizde ondaı bolǵan joq. Ákim usynyldy. Depýtattar jasyryn túrde saılap jiberdi. Biz óz quqyǵymyzdy paıdalana almaı qaldyq."

Shyrǵanaq aýylyna osydan 4 jyl buryn saılanǵan Orazbaı Bekbatyrov naǵyz bilikti basshy, úzdik uıymdastyrýshy, halyqtyń shynaıy janashyry bola bildi deıdi, jergilikti turǵyndar. Ol ákim bolǵan kezinde el ıgiligi úshin nátıjeli jumystar atqarǵan.

Nurjibek Sadyrova, zeınetker:

"Bizdiń aýylda kóp ózgeris boldy. Myna ardagerler aleıasy, fýtbol alańy, ıesiz qalǵan úıdi remonttap balalarǵa arnalǵan sport kompleks salyndy. Biz birigip jasady. Úkimetten bir tıyn almadyq. Qoǵamdyq uıymmen, ákimmen birge saldyq."

Saılaý nátıjesi boıynsha 2600 turǵyny bar Shyrǵanaq aýylyn basqarýǵa, 2 jyl Qarqara aýyldyq okrýgi ákimi apparatynyń qurylymdyq bólimshesiniń basshysy bolyp istegen Ernat Sarybaev kelgen. Ol aýdandyq máslıhat depýtattaryneyń basym daýysyna ıe bolǵan. Dese de Shyrǵanaqtyqtar jas ákimdi qabyldamaımyz, ákimdikke qaıta Orazbaı Bekbatyrov nemese ózimizdiń aýyldyń azamaty basqarsyn dep talap etedi.

Tursynáli Ábdimanap, Shyrǵanaq aýyly, qoǵamdyq uıymdar qaýymdastyǵynyń tóraǵasy

"Bİz ol kisini qabyldamaımyz. Múmkin ol isker de shyǵar. Bizge qaıta saılaý ótkizip, ózimizdiń ákimdi qoısyn nemese osy aýyldyń azamatyn qoısyn."

Memlekettik qyzmette 8 jyldyq ótilimim bar degen Ernat Sarybaev. Saılaýdyń ádil ótkenin, óziniń osy qyzmetke ábden laıyq ekenin aıtady.

Ernat Sarybaev, Shyrǵanaq aýyldyq okrýginiń jańa ákimi

"Árıne, nege, men de sonsha jyl memlekettik qyzmette eńbek ettim. Jasta bolsa, bas bolaıyn dep bul aýyldy kórkeıtýge óz úlesimdi nege qospasqa, halyq qoldap tursa, nege birigip jumys istemeske."

Al Kegen aýdanynyń ákimi Talǵat Baıedilov saılaý kezinde eńbek demalysynda bolǵanyn, biraq orynbasary arqyly aýyl ákimi saılaýyn baqylap otyrǵanyn aıtty. Ol "saılaý ádil ótti, eshqandaı quqyqbuzýshylyq bolǵan joq" deıdi. Sondaı-aq Analar keńesiniń tóraıymy Roza Batyrhanovanyń sózin teristep, 10 naýryzda kandıdattardy kelisý týraly jıynǵa qoǵamdyq keńestiń músheleri qatystyrylǵanyn málimdedi. Aýdan ákimi jıyn kezinde "kandıdattarǵa eshqandaı qarsylyq bolmady, endi kelip, shý shyǵarǵandary túsiniksiz" dep otyr.

Talǵat Eskendiruly Baedilov, Kegen aýdanynyń ákimi

Suraqty kóterip otyrǵandardyń ózderi, qoǵamdyq keńestiń músheleri qatysty. Olar suraq qoıdy. Men keshigip kelgeninde bilemin. Qatysyp otyryp qatyspadyq, 36 bap buzyldy degenmen kelispeımin.

Shyrǵanaqtyqtar daýys bergen 12 depýtattyń 10-y aýdan basshylyǵyna baǵynyshty mekeme jetekshileri ekenin eskersek, saılaýdyń ádil ótpegenine tań qalýǵa bolmaıdy deıdi. Endi olar saıası naýqanǵa jaýapty bolǵan aýdan ákimi, máslıhat hatshysy jáne aýdandyq saılaý komısıasynyń tóraǵasyn sotqa berýge bel býyp otyr.