Saıt málimetinshe, Mamın Toqaevqa bıylǵy qańtar-naýryz aılaryndaǵy eldegi áleýmettik-ekonomıkalyq damýdyń qorytyndylary jáne sanıtarlyq-epıdemıologıalyq ahýal jóninde esep bergen.

Premer-mınıstrdiń málimetine sáıkes, atalǵan kezeńde ekonomıkanyń naqty sektorynda ornyqty damýdyń oń qarqyny baıqalady.

"Asqar Mamın Qasym-Jomart Toqaevqa elimizdegi sanıtarlyq-epıdemıologıalyq ahýal jaıynda baıandady. Aýrýhanalardaǵy juqpaly dertke shaldyqqandarǵa arnalǵan bólimderdiń – 41 paıyzynda, jan saqtaý bólimderdiń – 27 paıyzynda naýqastar em qabyldap jatyr. Sáýir aıynan bastap óńirlerde aı saıyn 2 mıllıon adamǵa vaksına salynady. Qyrkúıek aıynda jalpy 10 mıllıon azamatqa ekpe salynyp, vaksınalaý jumysy aıaqtalady" delingen habarlamada.

Premer-mınıstrdiń aıtýynsha, densaýlyq saqtaý júıesi qajetti mólsherde dári-dármektermen jáne medısınalyq jabdyqtarmen tolyq qamtamasyz etilgen. Medısınalyq mekemelerde dári-dármektiń bir aılyq, al "SQ-Farmasıa" qoımalary men dárihanalarda eki aılyq qory jınaqtalǵan. Elimizdiń barlyq óńirinde dári-dármekterdiń, qorǵanysh quraldary men shprısterdiń úsh aıǵa jetetin turaqty qory bar.

Sonymen qatar kezdesý barysynda memlekettik baǵdarlamalardy, Qazaqstannyń Eýrazıalyq ekonomıkalyq odaqqa tóraǵalyǵynyń basym baǵyttaryn júzege asyrý jáne ınvestısıa tartý, ekonomıka salasyn odan ári sıfrlandyrý, úkimettiń jumysyna ozyq sıfrlyq sheshimder engizý, halyqty jumyspen qamtýdy qoldaý, áleýmettik mańyzy bar taýarlardyń baǵasyn turaqtandyrý jóninde qabyldanyp jatqan sharalar týraly máseleler talqylanǵan.