Bıyl Jańaózen qalasyna 18 050 sharshy metr gazon, 700 dana aǵash, 5 550 p.m buta, 13 955 dana kóp jyldyq raýshan gúli jáne 37 000 dana bir jyldyq gúlder egiledi. Muny Jańaózen qalasy ákiminiń orynbasary Berik İzǵalıev málimdedi.

– Munaıshylar shaharynyń aýmaǵyn kógaldandyrý jumysyna jergilikti búdjetten 388 322,7 myń teńge bólingen. Memlekettik satyp alýdyń ashyq konkýrsy nátıjesinde «Aqtaý servıs qurylys» seriktestigi jeńimpaz dep tanylyp, qalany kógaldandyrý jumystaryn 368 885,3 myń teńgege jasap bermek, – deıdi B.İzǵalıev. 

Negizinen munaıshylar shaharyndaǵy Mańǵystaý, Qashaǵan, Sátbaev, Qosqulaq, Beıbitshilik, Dostyq, Abaı kóshelerindegi jáne saıabaqtarda ornalasqan jasyl jelekterdi kútip ustaý júzege asyrylady. Qala aýmaǵyndaǵy barlyq sýarý qubyrlaryn kútip ustaý jumystary qarastyrylǵan. Qajettiligine qaraı jańa qubyrlar salynbaq.

Ótken 2020 jyly qalanyń keıbir aýmaqtarynyń jasyl jelekterin sýarý júıesi, tamshylatyp sýarý júıesine aýystrylyp iske qosyldy. Atalǵan júıe aýyz sýdy únemdeý maqsatynda júzege asyrylýda. Osy júıe aǵymdaǵy jyly jalǵasyn tabatyn bolady.

Sáýir jáne mamyr aılarynda aǵashtardy ákteý, sýarýǵa daıyndaý, jasyl jelekterdi zıankesterden ýlaý, sý qubyrlaryn sýarýǵa ázirleý, jańadan egiletin jasyl jelekterdi otyrǵyzý sekildi jumystary júzege asyrylatyn bolady.

Jasyl jelekterdi sýarý jumystary mamyr aıynan bastalady. Jalpy kógaldandyrýǵa 70 adam jumyspen qamtylatyn bolady.