Prezıdent Qasym-Jomart Toqaev kórnekti teatr jáne kıno aktrısasy Ǵazıza Ábdinábıevanyń otbasy men jaqyn týystaryna kóńil aıtty. Bul týraly prezıdenttiń baspasóz hatshysy Berik Ýálı habarlady.
"Ǵazıza Mákeshqyzy ár jyldary Ǵ.Músirepov atyndaǵy Qazaq memlekettik akademıalyq balalar men jasóspirimder teatrynda jáne M.Áýezov atyndaǵy Qazaq memlekettik akademıalyq drama teatrynda qyzmet jasady. Birqatar otandyq fılmder men teleserıaldarda basty rólderdi somdap, kórermenniń joǵary baǵasyn alǵan edi. Ol árbir qazaqstandyqtyń jadynda jarqyldap, jadyrap júretin beınesimen qaldy. Marqumnyń ımany salamat, jany jánnatta bolsyn" delingen jedelhatta.
Keshe Qazaqstannyń eńbek sińirgen ártisi Ǵazıza Ábdinábıeva 73 jasyna qaraǵan shaǵynda kóz jumǵan.
