Májilistiń jalpy otyrysynda depýtat, Aqjol partıasynyń ókili Maqsat Raıymqulov premer-mınıstrdiń orynbasary Eraly Toǵjanovqa áleýmettik saladaǵy qatardaǵy qyzmetkerlerdiń jalaqysyn kóterý máselesin qarastyrýdy surap, depýtattyq saýal joldady.

Depýtat resmı saýalda sanıtar, asıstent, eden jýýshy, jedel járdem júrgizýshisi sekildi qatardaǵy qyzmetkerler men murajaı, óner, mektep, balabaqsha, kitaphana, muraǵat salasyndaǵy mamandar áriptesteri úshin memleket jyl saıyn jalaqyny kóbeıtip, kóptegen jyldar boıy ózderiniń eńbekaqysy ózgerissiz qalyp otyrǵanyna jıi shaǵynatynyn jetkizgen.

Onyń aıtýynsha, muraǵat, murajaı jáne kitaphana qyzmetkerleriniń tarıhshylar, ónertanýshylardyń ortasha jalaqysy 60 myń teńgeni quraıdy. Jedel járdem júrgizýshileriniń jalaqysy shamamen 70-75 myń teńge jáne 5 jyldan astam ýaqyt boıy joǵarylamaǵan. Mektepter men balabaqshalardyń tehnıkalyq qyzmetkerleriniń jalaqysy shamamen 50 myń teńge.

– Sonymen qatar, ınflásıanyń ekonomıkalyq sıpatyn eshkim joıǵan joq, memlekettik organdar taýarlar men azyq-túlik baǵasynyń ósýin aıtpaǵannyń ózinde, turǵyn úı komýnaldyq sharýashylyǵyndaǵy monopolıser tarıfterdi únemi ulǵaıtady. Bizdiń azamattarymyzdyń bul sanaty tipti ıpoteka boıynsha turǵyn úıge qol jetkize almaıdy jáne ondaǵan jyldar boıy jaldamaly páterlerde turady. Jalaqylaryna durys kıine almaıdy, balalaryn asyraı almaıdy, kúndelikti máselelerdi sheshe almaıdy. Alaıda bul azamattar bizdiń memleket retinde jaýap beretin mamandarymyz emes pe?! Osyndaı jalaqyǵa qalaı ómir súrsin? Biz tehnıkalyq kadrlardyń áleýmettik saladaǵy, ıaǵnı bilim berý, densaýlyq saqtaý júıesindegi, mádenıettegi múddelerin qorǵaý máselesi memleket nazarynan tys qaldy dep sanaımyz. Osyǵan baılanysty "Aq jol" fraksıasy áleýmettik saladaǵy jalaqyny kóterý kezinde bir mezgilde tehnıkalyq qyzmetkerlerdiń eńbekaqysyn kóterý qajet dep esepteıdi. Sondyqtan biz áleýmettik salanyń kómekshi jáne tehnıkalyq qyzmetkerlerine qatysty ádilettilik tanytýdy, jalaqyny kóterý kezinde olardy nazardan tys qaldyrmaýdy suraımyz.

Nelikten bizdiń osy saladaǵy mamandarymyz qınalýy kerek, olardyń da kóptegen problemalary bar emes pe, olar da bizdiń memleketimizdiń azamattary ǵoı?!  Meniń bilýimshe, osy azamattardyń 90 paıyzynyń shaǵyn nesıeleri bar, qaryzǵa belshesinen batqan, shyǵarmashylyq týyndylaryn shyǵarýǵa qarajaty joq, Úkimet tarapynan naqty kómek te joq. Atalǵan faktorlar áleýmettik "jarylysqa" ulasýy múmkin áleýmettik shıelenisti kúsheıte túsedi.

Joǵaryda aıtylǵandarǵa baılanysty, "Aq jol" depýtattyq fraksıasy aıtylǵan máselege nazar aýdarýdy qajet dep esepteıdi jáne atalǵan sanattaǵy qyzmetkerlerdi laıyqty tabys deńgeıimen qamtamasyz etý múmkindigin qaraýdy suraıdy, – dep málimdedi partıa múshesi.