Amerıka Qurama Shtattarynyń Qazaqstandaǵy tótenshe jáne ókiletti elshisi Ýılám H. Mozer onlaın formatta qazaqstandyq buqaralyq aqparat quraldary ókilderimen kezdesti. Kezdesý barysynda qos el yntymaqtastyǵynyń 30 jyldyq tarıhyndaǵy atqarylǵan keı ister baıan etildi.

Ýılám Mozer 1990 jyldardan beri AQSH Qazaqstan ekonomıkasyna 30-35 mlrd dollar kóleminde ınvestısıa salǵanyn, bul úrdis keleshekte de jalǵasatynyn aıtty. Onyń sózinshe, AQSH tarapynan salynǵan ınvestısıa buryn negizinen munaı salasyna baǵyttalsa, endi aýylsharýashylyǵy, İT salaǵa da qarajat tartý máselesi qarastyrylyp otyr. Elshi ol úshin Qazaqstan úkimeti bızneske qolaıly iskerlik orta qalyptastyratynyna senim bildirdi.

Sondaı-aq Ýılám Mozer AQSH pen Qazaqstan arasynda vızasyz rejım engizý búgingi pandemıa jaǵdaıynda qarastyrylyp otyrmaǵanyn, yqtymaqtastyq máselesinde budan da mańyzdy máseleler kóp ekenin jetkizdi.

Elshi sonymen qatar AQSH-ta koronavırýsqa qarsy vaksınasıa qarqyndy júrip jatqanyn, azamattar vaksınasıamen tolyq qamtylyp bolǵan soń ony basqa elderge shyǵarý josparlanyp otyrǵanyn málim etti. Ýılám Mozer ózi Moderna vaksınasyn saldyrǵan. Aıtýynsha, ekpeni oń qolyna saldyrǵanymen, sol qoly azdap syzdaǵan. Ol vaksınadan keıingi jaısyzdyq uzaqqa sozylmaıtynyn jetkizip, Qazaqstan halqyn vaksına saldyrýǵa shaqyrdy.

Jıyn barysynda Ýılám Mozer qazaq tilin yqylaspen úırenip júrgenin atap ótti.