Buǵan deıin Birtanovqa otbasy músheleri men advokatynan ózge eshkimmen sóılesýge bolmaıtyn. Tipti oǵan shashtaraz da kirgizilmegen. Endi jańa sharalarǵa baılanysty ol jumysqa bara jatyp jolaı jolyqqan adamdarmen sóılese alady. 8:00 men 19:00 aralyǵynan tys ýaqytta shekteý burynǵysha qala beredi.

Eljan Birtanov 2020 jylǵy 3 qarashada qamaýǵa alynǵan. Ol asa iri kólemde búdjet qarjysyn ysyrap etý faktisi boıynsha kúdikke alynǵan. 7 qarashada Birtanovqa qatysty bultartpaý sharasy ózgertilip, úı qamaqqa alynǵan. Munan soń úı qamaqqa alý sharasy áldeneshe ret uzartylǵan.

Eks-mınıstrdiń advokaty Dmıtrıı Kýráchenko Birtanovty úı qamaqta negizsiz ustap otyr dep sanaıdy. Onyń aıtýynsha, bul tergeý isine kedergi keltirip jatyr, osylaısha tergeýshiler Eljan Birtanovty qýdalaýdyń barlyq sebepterin qarastyrýy múmkin.

– Eks-mınıstrdiń aqsha jymqyrý jáne ysyrap etý faktisine naqty dálelder tabylǵan joq. Kerisinshe, onyń kinásizdigin rastaıtyn faktiler jeterlik. Negizgi kúdik horvatıalyq "Erıkson Nıkola Tesla" kompanıasynyń ıntegrasıalanǵan Densaýlyq saqtaý platformasynyń jetkizýshisi jasaǵan boljamdarǵa negizdelgen. Alaıda tipti "EGOV" saıtynda azamattar anyqtaǵan medısınalyq mekemelerde tirkeý týraly jaqynda bolǵan janjal platformanyń jumys istep turǵanyn rastaıdy. Bas prokýratýra Birtanovty qorǵaýdyń ótinishin qoldap, tergeý týraly "Erıkson Nıkola Teslanyń" qatysýymen qaıta saraptama taǵaıyndady, – dep málimdegen Dmıtrıı Kýráchenko.

Aldymen 2020 jylǵy 5 qarashada Qazaqstandaǵy belgili 10-nan astam dárigerdiń Birtanovty qoldap jazǵan ashyq haty jarıalandy.

Ashyq hat avtorlary Birtanov jumysty tıimdi istegenin, pasıentter men áriptesterine ashyq mınıstr bolǵanyn tilge tıek etip, onyń qarapaıym sanıtardan bastap, taksıkolog dáriger, bólim meńgerýshisi, ǵylymı ortalyq pen medısınalyq holdıń jetekshisi, mınıstr qyzmetterin atqarǵanyn alǵa tartqan.

Sondaı-aq dárigerler Birtanovtaı bilikti uıymdastyrýshynyń jemqorlyq deregine qatysy baryna kúmán keltiretinderin aıtyp, onyń elge myqty mamandardy tartýdaǵy eńbegin, densaýlyq saqtaý júıesiniń damýyna qosqan úlesin, medısına qyzmetkerleri eńbekaqysyn arttyrýǵa yqpal jasaǵanyn atap ótken.

Al 2020 jylǵy 6 qarashada nevropatolog-dáriger Qaıyrǵalı Koneev "Birtanovqa taǵaıyndalǵan bultartpaý sharasyn ózgerissiz qaldyrýdy talap etken" onlaın-petısıa iske qosqan.

Petısıa avtorynyń sózinshe, Birtanov repýtasıasyn saýyqtandyrýǵa arnalǵan áleýmettik jelidegi kampanıa "búdjet qarjysyn ysyrap qylǵany" úshin ustalǵan mınıstrdi "pandemıaǵa daıyn bolmaǵany úshin aıyptady" dep qoǵamdy adastyryp otyr. Avtor "kampanıa uıymdastyrýshylary osy arqyly memlekettik organdarǵa qysym kórsetip otyr" dep sanaıdy.

Petısıa uıymdastyrýshylary Eljan Birtanovtyń jaqtastaryna qatysty qylmystyq kodekstiń 407-baby 2 tarmaǵy boıynsha (Sotqa deıingi, jan-jaqty, tolyq jáne obektıvti tergep-tekserýge kedergi jasaý maqsatynda prokýrordyń nemese sotqa deıingi tergep-tekserýdi júzege asyratyn adamnyń qyzmetine qandaı da bolmasyn túrde aralasý) qylmystyq is qozǵaýǵa shaqyryp, sot prosesi aıaqtalǵanǵa deıin eks-mınıstrdi qamaýda ustaý sharasyn ózgertpeýdi talap etti.

Eks-mınıstrdiń kútikke ilinýine qarama-qaıshy kózqaras áleýmettik jelide de baıqaldy.

Birtanovty jaqtaýshylar onyń qoǵamǵa ashyq mınıstr bolǵanyn atap ótip, "Birtanov isi" farmasevtıka lobbısteri arasyndaǵy saıası tapsyrys bolýy múmkin ekenin jazǵan.

Alaıda 2019 jylǵy mamyr-tamyz aılaryndaǵy qaıtys bolǵandar men 2020 jylǵy sáıkes kezeńde ólgender arasyndaǵy 31 myń aıyrmashylyqty aıtyp, burynǵy mınıstr jaqtastaryn synap jatqandar da bar. Sondaı-aq olar Birtanov vıse-mınıstr, mınıstr bolǵan jyldary aýrýhanalardaǵy tósek ornynyń 24 myń 960 orynǵa kemýine jol bergenin málim etti.