Qazaqstannyń bas sanıtar dárigeri Erlan Qıasov ortalyq komýnıkasıalar alańynda ótken brıfıńte eldegi epıdemologıalyq jaǵdaı týraly málimdedi. 

– Qazaqstannyń 10 óńiri "qyzyl" aımaqta tur. Olar: Nur-Sultan, Almaty jáne Shymkent qalalary, Atyraý, Batys Qazaqstan, Aqmola, Qaraǵandy, Aqtóbe, Mańǵystaý jáne Qyzylorda oblystary. Epıdemıologıalyq jaǵdaı matrısasyna sáıkes Qazaqstan 23 kún boıy "qyzyl" aımaqta tur. Búgingi kúni álemde KVI-diń 141 mıllıonnan astam jaǵdaıy tirkelgen. Táýligine 700 myńnan astam jaǵdaı tirkelip jatyr. 3 mln-nan astam adam qaıtys boldy. Ólim kórsetkishi 2,1 paıyzdy qurap otyr. DDU-nyń alty aımaǵynyń beseýinde aýrýdyń ósý tendensıasy baıqalady. 21 sáýirdegi jaǵdaı boıynsha elde COVID-19 oń nátıjesimen 294 946 naýqas jáne KVI-diń teris nátıjesimen 52 025 jaǵdaı tirkeldi. KVI-diń oń nátıjesimen aýyrǵan 252 598 naýqas jáne KVI-diń teris nátıjesimen aýyrǵan 50 839 naýqas emdeldi, – dedi bas sanıtar dáriger.

Onyń aıtýynsha, 21 sáýirdegi jaǵdaıǵa saı, respýblıka boıynsha ınfeksıalyq tósek-oryndardyń 41 paıyzy bos emes, reanımasıalyq tósek-oryndardyń – 28 paıyzy tolǵan.

– Infeksıalyq tósekterdiń eń kóp qamtylýy Batys Qazaqstan oblysynda jáne Almaty oblysynda – 58%-dan jáne Almaty qalasynda – 55%-dan baıqalady. Reanımasıalyq tósekterdiń eń kóp qamtylýy Almaty qalasynda – 56% jáne Nur-Sultan qalasynda – 58%, – dep atap ótti E. Qıasov.