COVID-19-ǵa qarsy QazVac (QazCovid-in) qazaqstandyq vaksınasynyń alǵashqy partıasy jóneltildi. Bul týraly rrimeminister.kz saıty  málim etti.

– "QazVac" vaksınasynyń alǵashqy 50 myń dozasy "SQ-Farmasıanyń" habtaryna taratylyp, odan ári elimizdiń barlyq óńirlerindegi densaýlyq saqtaý basqarmalarynyń qoımalaryna jetkiziletin bolady. Bıyl 26 sáýirde halyqty "QazVac" vaksınasymen vaksınasıalaý bastalady. Mamyr aıynda 50 myń doza kólemindegi vaksınanyń kezekti partıasyn shyǵarý josparlanýda, – dedi QR premer-mınıstriniń orynbasary Eraly Toǵjanov Bıologıalyq qaýipsizdik problemalary ǵylymı-zertteý ınstıtýtyna jasaǵan sapary barysynda.

Onyń aıtýynsha, vaksına óndirisi kezeń-kezeńmen aıyna 500-600 myń dozaǵa deıin ulǵaıtylmaq.

Sondaı-aq qazaqstandyq vaksına Dúnıejúzilik densaýlyq saqtaý uıymynyń tizilimine engizilgeni habarlandy.

"Onyń tolyq qaýipsizdigi dáleldendi, vaksına koronavırýs ınfeksıasyna qarsy turaqty ımýnıtetti qalyptastyrady. Inaktıvtendirilgen vaksınanyń artyqshylyǵy, ol vaksınamen baılanysty aýrýlardy týdyrmaıdy. Budan basqa, "QazVac" vaksınasyn jetkizý ádisteri kúrdeli tońazytqysh qondyrǵylaryn talap etpeıdi, olar tońazytqyshta +2-8 gradýs temperatýrada tasymaldanady" delingen aqparattyq habarlamada.

Qazaqstanda koronavırýsqa qarsy jappaı vaksınasıa 1 aqpanda bastaldy. 2021 jylǵy 22 sáýirdegi málimet boıynsha Qazaqstanda 796 383 adam vaksına saldyrǵan. Búginde azamattarǵa reseılik Spýtnık-V ekpesi salynyp jatyr. Brıtanıalyq "The Lancet" medısınalyq ǵylymı jýrnaly "Spýtnık V" vaksınasy 91,6 paıyzǵa tıimdi ekenin málim etken.