Almatydaǵy Shoqan Ýálıhanov atyndaǵy alańda Demokratıalyq partıa bastamashyl toby men onyń jaqtastarynyń jer satýǵa qarsy mıtıńi bastaldy.

Almaty sanıtarlyq-epıdemıologıalyq baqylaý departamenti eldegi epıdemıologıalyq jaǵdaıǵa baılanysty mıtıń ótkizýge ruqsat bermegen. Alaıda oqıǵa ornynda júrgen Qamshy tilshileri alańǵa 200-ge jýyq adam jınalǵanyn jetkizdi. 

Mıtıńke shyqqandardyń qoldaryndaǵy plakattarda "Qazaqstannyń jerin satpańdar", "Sańyraý prezıdent kerek emes", "Ormandy qazaq ta ósire alady", "Qytaı, jerimizge kóz salma", "Qytaıǵa jer berý – ulttyq satqyndyq" dep jazylǵan. 

Belsendiler sherýmen respýblıka alańyna qaraı júre bastaǵanda, arnaıy jasaq toqtatyp tastady.

Mıtıń ótip jatqan alańda ınternet buǵattalǵan jáne polısıa qyzmetkerleri men arnaıy sanıtarlyq mamandar júr. 

Mıtıńke Dempartıa ókilderinen bólek qoǵam qaıratkeri, jýrnalıs Rysbek Sársenbaıuly, saıasatker Tólegen Jókeev, belsendi Rysbek Toqtasyn jáne belgili rejıser Erkin Raqyshev shyqqan.

Sonymen qatar "Birtutas Jeltoqsan uıymynyń múshelerimiz" dep tanystyrǵan bir top adam qoldaryna “Jer komısıasy taratylsyn”, “Jer ıesi – halyq" dep plakat alyp shyqqan.