«Nur Otan» partıasy Tóraǵasynyń birinshi orynbasary Baýyrjan Baıbek qalalyqtarmen birge «Birge – Taza Qazaqstan» ekologıalyq aksıasyna qatysty. Bul týraly ol Instagram jelisindegi paraqshasynda jazdy.

Onyń aıtýynsha, partıa Ortalyq apparatynyń qyzmetkerleri Shyńǵys Aıtmatov atyndaǵy kósheniń boıyna 80 túp aǵash otyrǵyzǵan. Ákimdiktiń deregi boıynsha, bıyl qalada barlyǵy 1 mln-nan astam jasyl jelek otyrǵyzý josparlanyp otyr.

«Ózderińizge málim, elordamyzdyń negizi qalanǵan sátten bastap Elbasy, memleketimizdiń Tuńǵysh Prezıdenti Nursultan Nazarbaev qalanyń sáýlettik kelbetine ǵana emes, sonymen qatar naǵyz jaıly qalalyq orta qurýǵa da erekshe nazar aýdardy. Búginde munda kóptegen saıabaq, skverler men aleıalar salynyp, qalalyqtardyń súıikti demalys oryndaryna aınaldy. Qalada da, sonymen qatar onyń mańaıynda da josparly túrde jasyl jelekter sany artyp keledi. Qolaıly klımattyq jaǵdaı qalyptastyrýda Elbasy bastamashylyq etken elorda mańynda «jasyl beldeý» qurý jobasynyń mańyzy zor», - dep jazdy ol.

Baýyrjan Baıbek atap ótkendeı, ekologıa sapasyn jaqsartý máselesi – «Nur Otan»-nyń saılaýaldy baǵdarlamasynyń da negizgi baǵyttarynyń biri.

Taıaýdaǵy 5 jylda partıa el kóleminde orman alqabyn ulǵaıtý jáne 2 mlrd-tan astam aǵash otyrǵyzý mindetin qoıyp otyr. Qalalar aýasynyń sapasyn jaqsartý, sý resýrstaryn utymdy paıdalaný, qaldyqtardy qaıta óńdeý boıynsha jumystar jalǵasýda. Osyǵan oraı 2025 jylǵa deıin Nur-Sultanda, Almatyda, Shymkentte, Atyraýda, Tarazda jáne Aqtóbede 6 qoqys óńdeý zaýytyn iske qosý josparlanyp otyr.

«Nur Otan»-nyń ekologıalyq saıasatyn iske asyrý aıasynda Almatydaǵy JES-2-ni gazǵa aýystyrý, Oral ózeni baseıniniń ekojúıesin saýyqtyrý baǵdarlamasyn qabyldaý jáne kólderdi tazartý boıynsha jumystar júrgizý josparlanýda. Shóleıttenýdiń, burynǵy Semeı ıadrolyq synaq polıgonynyń, Baıqońyr ǵarysh aılaǵynyń jáne Aral teńiziniń soltústik bóligin qalpyna keltirýdiń ekologıalyq máselelerin sheshý jalǵasyn tabady», - dedi Baýyrjan Baıbek.

Onyń taratqan aqparatyna súıensek, elordada partıanyń saılaýaldy baǵdarlamasy boıynsha bes turǵyn alqapta 10 skver salý, jaǵalaý jıegin abattandyra otyryp, Aqbulaq jylǵasynyń arnasyn rekonstrýksıalaý, Vácheslav jáne Qoıandy sý qoımalarynda tabıǵatty qorǵaý sharalaryn iske asyrý jáne taǵy da basqa kóptegen sharalar kózdelgen.