Búgin, 26 sáýirde Nur-Sultan qalasynyń № 9 emhanasynda Densaýlyq saqtaý mınıstri Alekseı Soı KVI-ǵa qarsy qazaqstandyq QazCovid-in (QAZVAC) vaksınasyn saldyrdy.

Densaýlyq saqtaý mınıstriginiń málimetinshe, vaksınany salar aldynda medısına qyzmetkeri bul eki dozaly vaksına ekenin jáne bir bótelke bir adamǵa arnalǵanyn, sonymen qatar otandyq vaksına muzdatýdy qajet etpeıtinin, plús 2-den 8 gradýsqa deıingi temperatýrada saqtalatynyn aıtqan.

Budan ári mınıstr jýrnalıske bergen suhbatynda Qazaqstandyq vaksınanyń alǵashqy partıasy Bıologıalyq qaýipsizdik problemalary ǵylymı-zertteý ınstıtýty bazasynda 50 myń doza kóleminde shyǵarylǵanyn jáne qazirdiń ózinde óńirler boıynsha taratylyp jatqanyn habarlady.

– Biz vaksınalar óndirisin iske qosqan jáne vaksınalardy shyǵarýdyń tolyq sıklin – ázirleýden bastap qoldanýǵa deıin óz betinshe ıgergen álemniń on eliniń qataryna kirýdemiz, bul – úlken jetistik. Qaraǵandylyq farmazavod vaksınalardyń negizgi partıalaryn qosymsha óndiredi, naryqty qanyqtyrady, ol bizdiń azamattarymyzǵa zamanaýı preparattarǵa qol jetkizýge múmkindik beredi, – dep atap ótti Alekseı Soı vaksınasıadan keıin.

"SQ-Farmasıa" biryńǵaı dıstrıbútorynyń habtaryna 50 myń doza kóleminde otandyq vaksınanyń birinshi partıasyn jetkizý 23 sáýirde júzege asyryldy. Onyń ishinde 6 000 dozany Nur-sultan men Almaty, 4 000 dozadan – Shymkent, Qaraǵandy, Shyǵys Qazaqstan jáne Almaty oblystary alady, qalǵan óńirlerge eki myń dozadan túsedi.