Memlekettik qyzmet isteri agenttigi Almaty oblysy Jarkent qalasynyń ákimi Bolat Omarovtyń ústinen qyzmettik tekseris bastady. Tekseriske qala ákiminiń júk kólikteri júrgizýshilerimen dóreki sóıleskeni kóringen vıdeo sebep bolǵan.

22 sáýirde "Qorǵas" shekara mańy yntymaqtastyǵy halyqaralyq ortalyǵyndaǵy Nur joly stansasynda eki júk kóliginiń júrgizýshisi ákimshilik kodekstiń 434-baby (usaq buzaqylyq) boıynsha qamaýǵa alynǵan. Shekara aýmaǵynda kezekte turǵan 100 jýyq júk kóliginiń júrgizýshisi Panfılov aýdandyq polısıa bóliminiń aldyna jınalyp, áriptesterin bosatýdy talap etken. Áleýmettik jelide taraǵan vıdeodan jınalǵandardy taraýǵa shaqyrýǵa kelgen ákim dóreki sóılegeni kórinedi.

– Olar zańdy buzǵany úshin ustaldy. Munda ne istep tursyńdar? Boqtama. Ne syǵalap tursyń? Bále izdep tursyń ba sen? Qaıtsańdarshy, ne bar mynda?, – deıdi ákim.

Onyń bul sózderine júrgizýshiler narazylyq tanytyp, "nege dikildep sóıleısiz, bizdi qorqytpańyz, sizdi sizdi halyq saılaǵan joq pa" deıdi. Sonda ákim "meni sen saılaǵan joqsyń" dep jaýap beredi.

Memlekettik qyzmet isteri agenttigi Almaty oblysy boıynsha departamentiniń málimetinshe, atalǵan fakti boıynsha Almaty oblysy ákimi apparaty basshysynyń atyna qyzmettik tekseris júrgizý týraly hat joldanyp, onyń nátıjeleri boıynsha tıisti sharalar qabyldanbaq.

 

 

 

Posmotret etý pýblıkasıý v Instagram

 

 

 

Pýblıkasıa ot ınternet-SMI «kris_p_brothers» (@kris_p_brothers_official)