Naqty jalaqy mólsheri 10 paıyzǵa, ıaǵnı 221 myń teńgege deıin artady dep josparlanyp otyr. Bul týraly premer-mınıstr Asqar Mamın úkimettiń búgingi otyrysynda málimdedi.

– Halyqty jumyspen qamtý – úkimettiń mańyzdy mindeti. Pandemıany eskere otyryp, keshendi sharalar qabyldandy, onyń ishinde "Eńbek" memlekettik baǵdarlamasynyń quraldary kúsheıtildi, jumyspen qamtýdyń jol kartasy iske asyryldy. Bıyl jumyspen qamtýdyń jol kartasy aıasynda turaqty jumys oryndaryn qurýǵa jáne óńirlerdiń áleýmettik ınfraqurylymyn jaqsartýǵa nazar aýdaryldy. Birinshi toqsan qorytyndysy boıynsha "Eńbek" baǵdarlamasymen 158 myń adam qamtyldy. Bıyl jyl sońyna deıin 1,2 mıllıon adamǵa jumyspen qamtýǵa járdem kórsetiledi. Naqty jalaqy mólsheri 10 paıyzǵa, ıaǵnı 221 myń teńgege deıin artady dep josparlanyp otyr. Jumyssyzdyq deńgeıi 4,9 paıyzdan aspaıdy, – dedi premer-mınıstr.

Onyń aıtýynsha, bıyl 30 myń adamdy kásipkerlik negizderine oqytý josparlanyp otyr.

– Pavlodar, Qaraǵandy jáne Atyraý oblystarynda turaqty jumys oryndaryn qurý boıynsha jumys qarqyny jaqsy. Ózge óńirlerge de osy baǵyttaǵy jumysty belsendi jalǵastyrý kerek. Ol úshin barlyq quraldar men qajetti resýrstar bar.

"Bastaý bıznes" jobasy tıimdiligin kórsetti. Bıyl 30 myń adamdy kásipkerlik negizderine oqytý josparlanyp otyr. "Atameken" palatasy eńbek mınıstrligimen birlesip, bilim alýshylardyń sanyn kóbeıtsin. "Eńbek" ulttyq jobasy ekonomıka salalaryn sapaly básekege qabiletti eńbek resýrstarymen qamtamasyz etýge tıis, – dedi Mamın.

Osy oraıda premer-mınıstr mınıstrlikterge birqatar tapsyrma júktedi.

– Birinshi, eńbek mınıstrligi 1 maýsymǵa deıin 2021-2025 jyldarǵa arnalǵan "Eńbek" ulttyq jobasyn úkimetke engizsin. Qoldaý sharalaryn nysanaly toptardyń problemalary men qajettilikterin eskere otyryp baǵyttaý kerek.

Ekinshi, ulttyq ekonomıka, eńbek mınıstrlikteri men ákimdikter 1 shildege deıin jumyspen qamtýdyń óńirlik kartalaryn ázirlesin. Jumyspen qamtýdyń josparly kórsetkishterine qol jetkizýge jáne turaqty jumys oryndaryn qurýǵa erekshe nazar aýdarý qajet.

Úshinshi, eńbek, qarjy, ulttyq ekonomıka mınıstrlikteri men óńirlerdiń ákimdikteri "Eńbek" jobasynyń is-sharalaryn qarjylandyrýdy qamtamasyz etsin, – dedi Asqar Mamın.