Májilistegi zańnama jáne sot-quqyqtyq reforma komıteti "Qazaqstan Respýblıkasyndaǵy saılaý týraly" Qazaqstan Respýblıkasynyń Konstıtýsıalyq zańyna ózgerister men tolyqtyrýlar engizý týraly" Konstıtýsıalyq zań jobasyn májilistiń jalpy otyrysynyń talqylaýyna usyndy.

Oǵan saı, aýdandyq mańyzy bar qala, aýyl, kent, aýyldyq okrýg ákimin saılaýdy taǵaıyndaý, oǵan qoıylatyn talaptar, atalǵan laýazymdarǵa kandıdattardy usyný tártibi bóliginde usynystar engiziledi. Osyǵan baılanysty, zań jobasynda saıası partıalardyń ákimge kandıdattar usynýy da, azamattardyń ózin-ózi usynýy da kózdeledi, bul rette ózin-ózi usynǵan adam ózin qoldaý úshin tıisti qol sanyn jınaýǵa tıis.

Ákimge kandıdattardy qoldaýǵa qol jınaý tártibi, olardy tirkeý, kandıdatýrany alyp tastaý, kandıdat usyný týraly sheshimniń kúshin joıý, tirkeý merzimi aıaqtalǵannan keıin ákimge kandıdattar usyný tártibi, ákimdi saılaý kezinde daýystardy sanaý, osy saılaýdyń qorytyndylaryn anyqtaý jáne jarıalaý tártibi belgilenedi.

Sondaı-aq barlyq deńgeıdegi saılaýda beriletin búletenderge "Bárine qarsymyn" baǵany engiziledi, sondaı-aq saıası partıalar úshin parlament májilisine ótýdiń shegi 7 paıyzdan 5 paıyzǵa deıin tómendetiledi.

– Bul shara saılaýǵa qatysatyn kandıdattyń nemese saıası partıanyń eshqaısysyna qanaǵattanbaıtyn azamattarǵa óz pikirin bildirýge múmkindik beredi. Baıandalǵannyń negizinde komıtet zań jobasyn Qazaqstan Respýblıkasy parlamenti májilisiniń jalpy otyrysynyń talqylaýyna engizýge bolady dep esepteıdi, – dedi komıtet tóraǵasy Qanat Mýsın.