Krıptovalúta naryǵynda Dogecoin quny taǵy da aıtarlyqtaı ósti. Keıbir sarapshylar bul ósýdi Ilon Masktyń 8 mamyrda "Saturday Night Live" baǵdarlamasyna qatysatynymen baılanystyrady.

Krıptovalútanyń ósýi seısenbide shamamen 30%, al bıyl 11000%-dan asty.

Dogecoin-nyń joǵarlaýy Tesla jáne SpaceX kompanıalarynyń bas dırektory Masktyń birneshe tvıtteriniń áserimen bastaldy. Sarpashylar qazirgi ósimge de Masktyń jaýapty ekenin aıtady.

"Dogecoin ósýde, óıtkeni kóptegen krıptovalúta treıderleri "Saturday Night Live" baǵdarlamasynda Ilon Masktyń kez kelgen áńgimesin jiberip alǵysy kelmeıdi" dep jazdy Oanda kompanıasynyń aǵa sarapshysy Edvard Moıa.

Dogecoin 2013 jyly ázil retinde bastalǵanymen, jaqsy damyp keledi. Ilon Mask, Dallas Maverıkstiń ıesi Mark Kýba, Snýp Dogg jáne Djın Sımmons sıaqty ataqty adamdardyń qoldaýymen onyń quny kóterilip keledi.

"Eger aktıvtiń aınalasynda jetkilikti qoǵamdastyq paıda bolyp, sol qaýymdastyq ýaqyt óte kele qandaı da bir forma arqyly uzaq merzimdi baǵany tıimdi qurýdy sheshse, bul shyn máninde qundy valútaǵa teńestirilýi múmkin" dedi qarjylyq sarapshy,  "BlockTower Capital" kompanıasynyń bas dırektory Maık Býkella.

"Dogecoin qazirdiń ózinde ulǵaıǵan baǵa kópirshigi bolýy múmkin. Degenmen, onyń qoldaýshylary tipti de joǵary kóterip jiberýge yqpal etýi yqtımal" deıdi ol. 

Buǵan deıin Dogecoin-dy qoldaıtyn Ilon Mask 28 sáýir kúni tvıtter paraqshasynda 8 mamyrda Saturday Night Live baǵdarlamasyna qatysatynyn jarıalap, "Dogefather" dep jazǵan bolatyn. Sodan keıin krıptovalúta quny joǵarlaı tústi. 

Ótken jyly Ilon Mask Mars valútasy krıptovalúta bolatynyn aıtyp, úmitker valúta retinde dogecoin-dy jarıalaǵan soń úshten bir ese qymbattaǵan. 

Bir aı buryn da Tesla kompanıasynyń bas atqarýshy dırektory jáne basqa tanymal adamdar yqpalymen valúta quny 650% mólsherinde kóterildi.