​Bilim jáne ǵylym mınıstrligi Shet tilder jáne iskerlik karera ýnıversıteti lısenzıasynyń kúshi toqtatylǵanyn habarlady. 

Mınıstrlik málimdeýinshe, bilim jáne ǵylym salasynda sapany qamtamasyz etý komıtetine Shet tilder jáne iskerlik karera ýnıversıtetiniń bilim sapasyna qatysty shaǵym kelip túsken. Osyǵan baılanysty joǵary oqý ornynda jospardan tys tekserý júrgizilgen. Oqý prosesiniń uıymdastyrylýyn baqylaý qorytyndysy boıynsha, zań buzýshylyqtar joıylǵanǵa deıin ýnıversıtet lısenzıasyn toqtatý týraly sheshim qabyldanǵan.

Júrgizilgen baqylaý barysynda ýnıversıtet stýdentteriniń bilimi tekserilip, bilim alýshylardyń 97%-y shekti baldy eńsere almaǵan.

– Jospardan tys tekserý barysynda JOO-da sabaqtar keste boıynsha ótkizilmeıtini anyqtaldy. Bilim alýshylardyń oqý jetistikterin tekserý nátıjeleri JOO-daǵy bilim berý sapasynyń tómen deńgeıin kórsetti. Odan bólek, oqý orny kadrlar daıarlaý boıynsha jumys berýshilermen belsendi jumys istemeıtini de baıqaldy. Shet tilder jáne iskerlik karera ýnıversıtetinde akademıalyq adaldyq qaǵıdattary da saqtalmaıdy. Máselen, SHTİKÝ stýdentteriniń kýrstyq jumystary ózge adamnyń eńbegin kóshirip alýdy tekserý júıesinen ótpeıdi, al dıplomdyq jumystar boıynsha akademıalyq qaǵıdalar buzylǵany anyqtalsa da qorǵaýǵa jiberilgen jaǵdaılar tirkeldi. Jalpy, ýnıversıtet bilim berý salasyndaǵy zańnamany óreskel buzýǵa jol bergen, – dedi Bilim jáne ǵylym salasynda sapany qamtamasyz etý komıtetiniń tóraıymy Gúlzat Kóbenova.

Zańnamaǵa sáıkes JOO lısenzıasynyń kúshi toqtatylǵan jaǵdaıda, stýdentter oqý ornynda anyqtalǵan buzýshylyqtardyń joıylýyn kútpeı-aq, basqa joǵary oqý oryndaryna aýysa alady.