Qazirgi tańda Qazaqstanda COVID-19 aýrýy boıynsha ahýaldyń jaqsarý serpini baıqalady. Bul týraly premer-mınıstri Asqar Mamınniń tóraǵalyǵymen ótken úkimet otyrysynda densaýlyq saqtaý mınıstri Alekseı Soı málim etti, dep jazady úkimettiń baspasóz qyzmeti.

Mınıstr málimetinshe, búginde vırýstyń reprodýktıvti ındeksi 0,98 quraıdy. Aýrýhana tósekteri 36%, reanımasıalyq tósek oryndar 28% toly. 6 óńir – Nur-Sultan jáne Almaty qalalary, Batys Qazaqstan, Aqmola, Qaraǵandy, Atyraý oblystary "qyzyl aımaqta" tur.

– Qazirgi tańda Qazaqstanda vaksınanyń birinshi komponenti 1,9 mln jýyq adamǵa, ekinshi komponenti shamamen 800 myń adamǵa salyndy. Qoımalar men medısınalyq mekemelerde vaksınalardyń jetkilikti kólemi bar. Vaksınalaý keste boıynsha júrgizilýde, –  dedi ol.

Alekseı Soı "Ashyq" qosymshasy engizilgeli 3 256 adam vırýs juqtyrǵany anyqtalǵanyn, keı azamattar aýyrsa da qoǵamdyq oryndarǵa baryp, ózge azamattarǵa vırýs juqtyrý qaýpin týdyryp otyrǵanyn atap ótti.

Premer-mınıstr shekteý sharalarynyń saqtalýyn baqylaıtyn monıtorıńtik toptardyń jumysyn jalǵastyrý qajettigin atap ótti.

– "Ashyq" qosymshasyn paıdalaný oń nátıjesin berip otyr. Sonyń arqasynda qyzmetter kórsetý salasyndaǵy bıznestiń jumys isteý múmkindigi jaqsardy, olarǵa kelýshi adamdardyń qaýipsizdigi artty. Qosymshany paıdalaný salalaryn odan ári de keńeıtý qajet, – dedi A. Mamın.