Senattyń búgingi ótken jalpy otyrysynda senator Dınar Nóketaeva mekteptegi kitaphanashylardyń jalaqysyn arttyrý máselesin kóterdi. Depýttattyń saýalyna bilim jáne ǵylym mınıstri Asqat Aımaǵambetov jaýap berdi. 

Senatordyń aıtýynsha, jalpy halyqqa qyzmet kórsetetin kitaphana qyzmetkerleriniń jalaqysy 30-50 paıyzǵa kóterilgen. Biraq mekteptegi kitaphanashylardyń eńbekaqysy ózgerissiz qalǵan.

Bilim jáne ǵylym mınıstri búginde mektep kitaphanalarynda 13,5 myń adam jumys isteıtinin jáne olardyń barlyǵy bilim qyzmetkerleri bolyp sanalatynyn atap ótti. Sondyqtan mádenıet salasyndaǵy kitaphanashylardyń jalaqysyn arttyrý sharalaryna ilinbeı qalǵan. 

– Bilim salasynda qyzmet etetin 13,5 myń kitaphanashynyń jalaqysy mádenıet salasyndaǵy áriptesterimen salystyrǵanda áldeqaıda tómen. Al jumys mazmuny birdeı jáne ózderińiz bilesizder, ásirese, shalǵaıdaǵy eldimekenderde jalǵyz kitaphana ǵana jumys isteıdi. Ol oqýshylardy ǵana emes, barlyq turǵyndy kitappen qamtamasyz etedi, – dedi Asqat Aımaǵambetov.

Mınıstrdiń sózinshe, búginde arnaıy jumys toby qurylǵan. Oǵan bilim jáne ǵylym, eńbek jáne halyqty áleýmettik qorǵaý mınıstrligi men qarjy mınıstrliginiń mamandary kiredi.