Mańǵystaý oblysyndaǵy epıdemıologıalyq ahýalǵa baılanysty bıylǵy oqý jylynyń basym bóligi qashyqtan oqytyldy. Degenmen de aqparattyq tehnologıalardy qoldana otyryp qashyqtan oqytý oqýshylar men ustazdardyń bilimi men biligin jańasha damytýǵa, ádeti men daǵdysyna tıimdi qaraýǵa múmkindik berdi.

Qashyqtan oqytýǵa qaramastan bıyl oqýshylardyń jetistikteri de az emes.

Túlekterdiń 227-sy "Altyn belgige", 359-y "Úzdik atestatqa" úmitker. Sońǵy úsh jylmen salystyrǵanda "Altyn belgi" ıegerleri shamamen 30%-ǵa, úzdik atestatpen bitirgender 40%-ǵa artty.

Jalpy bilim beretin pánder boıynsha respýblıkalyq olımpıadada Mańǵystaý oblysynyń daryndy oqýshylary 29 medalǵa ıe boldy.

Olımpıada nátıjesi boıynsha Mańǵystaý oblysy komandalyq İİİ oryndy, Aqtaý qalasynyń "Bilim-ınnovasıa" lıseıi İİ oryndy, Munaıly aýdany №3 jalpy bilim beretin mektebi "Úzdik olımpıadalyq aýyl mektebi" bolyp tanyldy.

Elimizde árbir pedagog erekshe mártebege ıe. Memleket tarapynan árbir pedagogtyń úzdiksiz damýyna barlyq jaǵdaı jasalyp keledi. Osyǵan baılanysty bıyl alǵash ret "Mańǵystaý oblysynyń bilim berý salasyna qosqan úlesi úshin" tósbelgisi taǵaıyndaldy.

Pedagogtardyń sheberligi nátıjesinde Aqtaý qalasy №14 mektebiniń hımıa páni muǵalimi Túlembetova Aısulý Baǵytqyzy elimizde alǵash ret taǵaıyndalǵan "Qazaqstannyń eńbek sińirgen ustazy" qurmetti ataǵyn, oblystyń bes muǵalimi respýblıkalyq "Úzdik pedagog" ataǵyn ıelendi.

Oblys ákimi Serikbaı Trumov oqýshylar men ustazdardy oqý jylynyń aıaqtalýymen quttyqtap, aldaǵy bilim synaǵynan jaqsy kórsetkishke qol jetkizýlerin tiledi.

"Qurmetti ustazdar, qadirli oqýshylar! Sizderdi oqý jylynyń aıaqtalýymen shyn júrekten quttyqtaımyn! Bıylǵy ulttyq biryńǵaı testileýdiń jańa erejesinde túlekterge erekshe jaǵdaılar jasaldy. Bıyl bitiretin 7011 túlektiń barlyǵy derlik ulttyq biryńǵaı testileýge qatysyp jatyr. Mektep túlekterine synaqtan súrinbeı ótip, memlekettik grant alyp, qalaǵan mamandyqtarynyń ıesi atanýlaryna tilektespin! Qurmetti túlekter! Týǵan ólkeniń ósip-órkendeýine úles qosar bilimdi, bilikti, ozat, shyn mánindegi naǵyz altyn túlek bolýlaryńyzǵa tilekshimin.Táýelsiz Qazaqstannyń týyn bıik ustar azamat bolyńyzdar! delingen ákim quttyqtaýynda.