«Nur Otan» azamattardyń ótinishterine qulaq asa ma? Halyq aldyndaǵy ýádeleriniń oryndalýyn qalaı baqylaıdy? Bul suraqtardyń jaýabyn partıanyń baspasóz qyzmeti kezekti sátti keısti mysalǵa ala otyryp aıtyp berdi.

2019 jyldyń kúzinde «Nur Otan» partıasy nóraǵasynyń birinshi orynbasary Baýyrjan Baıbek Shymkentke jumys sapary barysynda «Azat» shaǵyn aýdanynyń turǵyndarymen kezdesken-di. Buǵan deıin BAQ jáne áleýmettik jeliler arqyly turǵyndar shaǵyn aýdan 2015 jyly qalaǵa qosylǵanyna qaramastan, tórt jyl ishinde ortalyq elektr, gaz jáne sýmen jabdyqtaý jelilerin júrgizý máselesi sheshilmegenine shaǵymdanǵan bolatyn.

– Elbasy, partıa nóraǵasy memlekettiń halyqqa jaqyn bolyp, azamattardyń muń-muqtajyn tyńdap, ashyq jumys isteýdi tapsyrdy. Memleket basshysy da «Halyq únine qulaq asatyn memleket» tujyrymdamasyn usynyp, azamattardyń syn-eskertpeleri men syndarly usynystaryna jedel den qoıýymyz kerektigin aıtty. Sondyqtan osy máseleni áleýmettik jeliden estip, bilip, arnaıy aldaryńyzǵa keldim. Qazir qala basshylyǵy, partıanyń qalalyq fılıaly bul túıtkildi ońtaıly sheshý úshin barlyq sharany qolǵa aldy. Biz bul isti sońyna deıin baqylaýda ustaımyz. Árıne, bul jerde sheshýdi talap etetin birqatar ózekti máseleniń bar ekenin bilemiz. Bárin birdeı sheshý múmkin emes. Sondyqtan memleket turǵyndardyń talap-tilekterin eskere otyryp, eń aldymen, gaz, jaryq jáne aýyz sý máselesin sheshýdi qolǵa aldy. Keıin jol jáne basqa da máselelerdi sheshemiz, – degen Baýyrjan Baıbek bul máseleniń partıanyń baqylaýynda bolatynyn aıtqan edi.

Partıanyń baspasóz qyzmeti habarlaǵandaı, kúni keshe «Nur Otan» qalalyq fılıalynyń tóraǵasy, Shymkent qalasynyń ákimi Murat Áıtenov osy shaǵyn aýdan turǵyndarymen kezdesken.

Búgingi tańda shaǵyn aýdanda barlyq elektr jelileri júrgizildi. Uzyndyǵy 8,7 km ortalyq sý qubyry jelileriniń jáne 10 km gaz qubyrynyń qurylysy aıaqtaldy. İshki joldardyń asfált jabynyn tóseý boıynsha jumystar 50%-ǵa oryndaldy. Sonymen qatar, 87 menshik ıesi jer ýchaskelerine memaktiler aldy. Taǵy 22 ýchaske boıynsha qujattar daıyndalý ústinde.

Maýsym aıynyń sońyna deıin abonentterdi ortalyq sý qubyryna qosýdy jáne aýyz sý berýdi qamtamasyz etý, 1 tamyzǵa deıin avtomatty gaz taratý stansıasynyń qurylysyn aıaqtap, gaz berý, al 1 qyrkúıekke deıin ishki joldardyń asfált jabynynyń ekinshi qabatyn salý josparlanyp otyr.

Atalǵan jumystardyń barlyǵy «Nur Otan» partıasy qalalyq fılıalynyń erekshe baqylaýyna alynǵan.