Saıasattanýshy, buryn Almaty qalasy, prezıdent ákimshiliginde istep, jıhaz jasaý bıznesine bet burǵan Sanjar Boqaev sońǵy ýaqytta otandyq avtokólik óndirisi salasyndaǵy kózboıaýshylyqtar týraly jıi másele kóterip júr. Ol úkimet saıtynan Qazaqstan 167 avtokólik modelin óndiretini týraly aqparat kórip, ındýstrıa jáne ınfraqurylymdyq damý mınıstrliginen 167 modeldiń naqty atyn atap, túsin tústeýdi suraǵan. Oǵan mınıstrlik jaýap bergen. Saıasattanýshy mınıstrlik jaýabyna qanaǵattanbaıtynyn aıtyp, premer-mınıstr Asqar Mamındi máselege jiti nazar aýdarýdy suraıdy.
– QR Indýstrıa mınıstrligi biz qandaı 167 avtokólik modelin óndiremiz degen suraǵyma jaýap berdi. Mınıstrliktiń jaýabyn qanaǵattanarlyqsyz dep esepteımin. 40 modeldi atap shyǵý, onyń ishinde 20-syn biz óndirmeımiz, daıyn kúıinde alyp kelemiz, al 80 modeldi kamazdardyń túrleri, taǵy 39 model avtobýstar deý, jaı ǵana ótirikti aqtaýǵa tyrysý emes, istiń naqty mán-jaıyn maqsatty túrde jasyrý dep esepteımin. Bul úkimet basshysy retinde sizdiń muqıat tekserý jáne baǵalaý júrgizýińizdi talap etetin másele, – degen ol Qazaqstan "Halyq únine qulaq asatyn memleket" quryp jatqanyn qaperge alyp, mınıstrlik derekterdi túzetýdiń ornyna, óziniń qyr sońyna túsip, arandatý áreketterin uıymdastyryp, aqparattyq soǵys ashqanyn aıtady.
Ol mınıstrlik sońǵy 10 jyl ishinde 130 jańa mashına qurastyrý zaýyty qaıda salynǵan degen saýaldy da jaýapsyz qaldyrǵanyn jetkizip, ındýstrıa mınıstrligi qatelikterin túzetip, 15 kún ishinde jaýap bermese, Esep komıteti men Bas prokýratýraǵa júginetinin málim etti.
– Sóz sońynda aıtarym, ózim baryp qazaqstandyq qamtýdy sanap shyǵý úshin 130 zaýyttyń mekenjaıy boıynsha aqparat berýdi sot arqyly talap etemin. Ázirge Úkimettiń barlyǵyn tekserýge, túzetýge jáne qoǵamǵa aqparatty jetkizýge múmkindigi bar. Asqar Uzaqbaıuly, Sizden "Halyq únine qulaq asatyn memleketti" qamtamasyz etýińizdi ótinemin. Men Sizdiń qyzmetten ketýińizdi suramaımyn. Sizdi nemese Sizdiń mınıstrlerińizdi aýystyrǵannan eshteńe ózgermeıdi. Óıtkeni dál sondaı adamdar oryndaryńyzǵa keledi. Biz qundylyqtardy ózgertýge tıispiz. Ótirikpen, kózboıaýshylyqpen jáne kásibısizdikpen kúresti birge jarıalaıyq. Sonda aınaladaǵy nárseniń barlyǵy ózgere bastaǵanyn kóresiz, – dedi Sanjan Boqaev.
Sanjan Boqaev sońǵy ýaqytta áleýmettik jelidegi paraqshalary men bergen suhbattarynda ózi kezinde belortasynda júrgen memlekettik qyzmettiń tıimsizdigi, Qazaqstandaǵy jemqorlyq, búdjet qarjysynyń jón-josyqsyz ysyrap etilip jatqany týraly jıi aıtyp júr.
Ol keıingi jazbalarynda otandyq avtoóndiris salasyndaǵy kózboıaýshylyqtar týraly jaza bastaǵan. Uzamaı ózderin mashına jasaıtyn óndiris oryndarynda isteıtin mamandar dep tanystyrǵan adamdar Boqaevty "jalǵan aqparat taratyp otyrǵany" úshin aıyptap, avtoónerkásip salasy qalaı júrip jatqanyn óz kózimen kórýi úshin zaýyttardy aralaýǵa shaqyrǵan. Boqaev sondaı zaýyttardyń biri ornalasqan Jambyl oblysy Qordaı aýdany Aýqatty aýylyna baryp, mashına qurastyratyn oryn delingen jerde birde-bir stanok joǵyn anyqtaǵan. Sol jerdeni adamdar onyń suraqtaryna jaýap bere almaı, telefonyn tartyp alýǵa, ózin arandatýǵa tyrysqan.
Sanjan Boqaev avtokólik óndirisiniń alpaýyty sanalatyn Japonıa men Germanıanyń ózinde 14 jáne 15 álemdik brend shyǵarylatynyn, al úkimet saıtynda Qazaqstanda 22 álemdik brendtiń 167 úlgisi qurastyrylatyny týraly aqparat jazylǵanyna tańǵalǵanyn jetkizgen.
