Almaty oblysyndaǵy Sharyn shatqalynda sel júrýiniń saldarynan 2 adamnyń ómirin qıǵan oqıǵanyń jaı-japsary habarlandy.
29 mamyr kúni Almatydaǵy Daryndy balalarǵa arnalǵan mamandandyrylǵan №199 gımnazıanyń 5 "Á" synybynda oqıtyn 8 oqýshy, 5 ata-ana, 3 muǵalimnen turatyn top Sharyn shatqalyna ekskýrsıaǵa shyǵady.
Sol kúni tús kezinde, ıaǵnı 13:35-te Almaty oblysy tótenshe jaǵdaılar deparlamentine shatqaldyń tómengi jaǵynda sel júrgeni týraly habar túsedi. Belgili bolǵandaı, kenetten 15 mınýt boıy burshaq aralasqan nóser jaýǵan. Osy ýaqytta oqýshylar men eresekterden quralǵan top shatqal ishinde júrgen.
Oqys oqıǵa saldarynan Mereı Ibragımov esimdi muǵalim men Ranıa Qasen esimdi oqýshy qaza tapty. 11 jastaǵy Zere Beısenbeı ushty-kúıli joǵalyp, ony kelesi kúni tańǵy 6-lar shamasynda oqıǵa bolǵan tustan birneshe shaqyrym jerden tapty. İzdeýge 100-ge jýyq adam qatysty.
– Jaýyn bastaldy, biz jasyrynyp qaldyq. Biraq jaýyn údeı tústi, naızaǵaı oınady. Sý kóptep jınala bastady. Biz tastardy ustanyp turǵanbyz. Bir mezette men qolymdy jiberdim. Óıtkeni aǵys qatty edi. Kózimdi jumdym da, jata kettim. Bir mezette tastan ustanyp, tyrmysyp jaǵaǵa shyqtym. Qurǵaq jerde otyryp, kómek kúttim, – deıdi Zere Beısenbeı. Qazir onyń jaǵdaıy ortasha turaqty dep baǵalanýda.
Qaza tapqan muǵalim Mereı Ibraımov 26 jasta bolǵan. Gımnazıada 3 jyl jumys istegen. Gımnazıa dırektory Sandýǵash Nyshanova qyzmetkeri Chehıada, Italıada oqyǵanyn, minezi ashyq, aqjarqyn, balalardyń súıikti muǵalimi bolǵanyn aıtady.
– Ol qyzdardy qutqarmaq bolǵan. Birin qutqardy, ekinshisin qutqara almady. Ózi de birge ketti, – deıdi Sandýǵash Nyshanova.
Qaıtys bolǵan oqýshy Ranıa Qasen 5-synypta oqyǵan.
Búginde 4 adam aýrýhanada jatyr. Onyń ekeýi oqýshy. 2009 jyly týǵan oqýshynyń jaǵdaıy aýyr. Onyń bassúıegi men mıyna zaqym kelgen, denesinde kóptegen jaraqat bar. Qalǵan naýqastardyń jaǵdaıy turaqty.
Almaty qalasy bilim basqarmasy shatqalǵa qydyrý demalysta uıymdastyrylǵanyn, bul týraly gımnazıa basshylyǵy bilmegenin málim etti.
Derekkóz: informburo.kz
