Búgin májilis tóraǵasy Nurlan Nyǵmatýlın Japonıa parlamenti ókilder palatasynyń spıkeri Tadamorı Oshımamen Qazaqstan men Japonıa arasyndaǵy jan-jaqty yntymaqtastyq pen parlamentaralyq dıalogty nyǵaıtý týraly kelissóz júrgizdi.

Beınekonferensıa baılanysy arqyly ótken kezdesýde májilis tóraǵasy Japonıa Qazaqstannyń Azıadaǵy mańyzdy strategıalyq seriktes el ekenin, qos memleket arasynda senimdi saıası dıalog ornap, yntymaqtastyqtyń berik irgetasy qalanǵanyn, oǵan Qazaqstan Respýblıkasynyń tuńǵysh prezıdenti-Elbasy Nursultan Nazarbaevtyń sheshýshi ról atqarǵanyn atap ótti.

Sondaı-aq, memleket basshysy Qasym-Jomart Toqaevtyń Japonıamen kópjosparly yntymaqtastyqty damytýǵa erekshe mán beretinin aıtqan Nurlan Nyǵmatýlın eldiń saıası júıesin jańǵyrtý, otandyq zańnamany jetildirý jónindegi jumystar týraly, prezıdenttiń saıası reformalaryndaǵy negizgi bolyp tabylatyn mıtıń jáne saılaý týraly zańdar jaıynda áńgimeledi.

Atap aıtqanda, palata spıkeri 29 jasqa deıingi áıelder men jastar úshin partıalyq tizimderde zańnamada kózdelgen 30 paıyzdyq kvotany, májilis saılaýynda saıası partıalar úshin ótý shegin tómendetý, barlyq deńgeıdegi saılaý búletenderine «Barlyǵyna qarsy» baǵanyn engizý sıaqty zańnamadaǵy jańalyqtardy atap ótti.

Kezdesý barasynda taraptar Qazaqstan men Japonıa arasyndaǵy qarym-qatynastarynyń mańyzdy quramdas bóligi retinde parlamentaralyq baılanysty jandandyrýdy qoldady.

Óz kezeginde, Tadamorı Oshıma Japonıa Qazaqstanmen yntymaqtastyqqa zor mán beretinin jáne strategıalyq seriktes memleket ekenin, eki el arasyndaǵy syndardy baılanys odan ári nyǵaıa túsetetine senim bildirdi.  Sonymen qatar, Qazaqstannyń tuńǵysh prezıdenti Nursultan Nazarbaevtyń ıadrolyq qarýdan azat álem qurýǵa qosqan erekshe úlesin atap ótti.

Nurlan Nyǵmatýlın men Tadamorı Oshıma parlamentaralyq dıalogty nyǵaıtý Qazaqstan men Japonıa arasyndaǵy ózara tıimdi yntymaqtastyqty damytýǵa yqpal etetinine senim bildirdi.

Májilistiń baspasóz qyzmeti