Qaraǵandyda 91 jastaǵy zeınetkerdiń páterin tonaǵan qaraqshylar ustaldy, – dep habarlady Polisia.kz saıty.

27 mamyrda saǵat 2:30 shamasynda Qaraǵandy qalasynyń polısıa bólimi Temirjol polısıa bólimine belgisiz adamdar 91 jastaǵy áje turǵan páterge basyp kirip, onyń barlyq jınaqtaryn alyp ketkeni týraly habarlama túsken.

"Qylmystyq kodeksiniń 191-baby (tonaý) boıynsha qylmystyq is qozǵalyp, jedel-tergeý toby iske kiristi. Jábirlenýshiniń aıtýynsha, tonaýshylar ekeý bolǵan. Olar zeınetkerdiń páterine esik arqyly kirgen, qart adamǵa qulypty ashyp jabý qıyndyq týdyrǵandyqtan, esiktiń sabyn oryndyqqa arqanmen baılaǵan. Betterin medısınalyq maskalarmen japqan qaskúnemder, qarıany qorqytyp, aqsha talap etken. Zeınetker olarǵa barlyq jınaqtaryn – 449 myń teńge berip qutylǵan. Polısıa qylmystyń yqtımal kýágerlerin anyqtaı otyryp, oqıǵa bolǵan jerge jaqyn ornalasqan turǵyndar men garaj ıelerimen, sondaı-aq ótip bara jatqan adamdarmen sóılese júrip, kúdiktilerdiń izine tústi. Jedel-izdestirý is-sharalaryn júrgizý barysynda krımınaldyq polısıa qyzmetkerleri kúdiktilerdi – 26 jáne 27 jastaǵy er adamdardy anyqtap, ustady. Kúdiktiler urlanǵan aqshanynyń biraz bóligin jumsap úlgergen eken. Osy qylmystyń egjeı-tegjeıin anyqtaǵannan keıin qylmystyq is Qazaqstan Respýblıkasy Qylmystyq kodeksiniń 192-baby (Qaraqshylyq) boıynsha qaıta saralandy. Qazirgi ýaqytta tergeý amaldary júrgizilip jatyr. Kúdiktiler ýaqytsha ustaý ızolátoryna ornalastyryldy" delingen aqparattyq habarlamada.