NurOtan partıasy tóraǵasynyń birinshi orynbasary Baýyrjan Baıbektiń azamattyq belsendiler, erli-zaıypty Janbolat Mamaı men Inga Imanbaıǵa qarsy bergen talap-aryzy boıynsha kezekti sot otyrysy ótip jatyr. Sotta Baýyrjan Baıbektiń múddesin qorǵap jatqan zańger Aıjan Táshenova erli-zaıyptylardyń sózi men isi ómirde qabyspaıtynyn málim etti.

Zańger J.Mamaıdyń ár sózinde eýropalyq jáne halyqaralyq standarttardy mysalǵa keltiretini, sóz bostandyǵy, zań ústemdigi týraly jıi aıtatyny jaı ǵana betperde ekenin aıtady.

– Óziniń kúndelikti ómirinde bular ózderi aıtyp júrgen standarttaryn oryndaı bermeıdi. Máselen, sotta aıqaılaıdy, sottyń jabyq ótip jatqanyn aıtyp shý shyǵarady, sottaǵy negizgi taqyrypty buryp, basqa másele qozǵaıdy, dálel beretin merzimdi keshiktiredi. Iaǵnı, zań ústemdigi bular úshin bos sóz. Men ózim Eýropada sotta tájirıbeden óttim. Ol jaqta bireýdiń syrtynan negizsiz jala jabýǵa eshkimge ruqsat etilmeıdi. Óıtkeni, árbir adam, onyń ishinde ózin jýrnalıs nemese saıasatker sanaıtyn ár tulǵa biledi – bireýge qatysty aıtqan ár sózińe dáleliń bolýy shart. Olaı bolmaǵan jaǵdaıda seniń aıtqanyń bos jala jáne sol úshin sotta jaýap beresiń.

Eger sheteldik tájirıbemen qaraıtyn bolsaq, Mamaı men Imanbaıdyń sot prosesin saıası kelekege aınaldyrýy, mıtıńter arqyly qysym kórsetýi – jaýapkershilik dep aıtýǵa bolady. Ol úshin iri kólemde aıyppul tóleýi nemese bas bostandyǵynan aırylýy múmkin. Eger jaýap berýshi tarap halyqaralyq standarttar týraly aıtar bolsa, ol endeshe zańdy da qurmetteýi kerek jáne onyń talaptaryna baǵynýy kerek, – dedi Aıjan Táshenova.

Ol sondaı-aq  sot tóraǵasyna BAQ ókilderine kedergi keltirmeı, bárine qatysýǵa múmkindik bergeni úshin alǵysyn aıtty.