Búgin Májiliste Palata Tóraǵasy Nurlan Nyǵmatýlın Armenıa Respýblıkasynyń Prezıdenti Armen Sarkısánmen kezdesti.

Nurlan Nyǵmatýlın Armenıa Prezıdentiniń elimizge eki memleket táýelsizdiginiń 30 jyldyǵyna arnalǵan memlekettik saparynyń mańyzdylyǵy týraly aıtty.

Sonymen qatar, Májilis Tóraǵasy Armenıa Prezıdenti Qazaqstannyń Tuńǵysh Prezıdenti, Elbasy Nursultan Nazarbaevpen, sondaı-aq Memleket Basshysy Qasym-Jomart Toqaevpen kelissózder barysynda qol jetkizilgen ýaǵdalastyqtardy is júzinde júzege asyrý úshin saıası dıalogty jáne Qazaqstan-Armenıa arasyndaǵy jan-jaqty ózara is-qımyldy nyǵaıtýǵa yqpal etetinine senim bildirdi.

Májilis Tóraǵasynyń aıtýynsha, qazaqstandyq parlamentshiler bul úshin qajetti zańnamalyq kómek kórsetedi.

Óz kezeginde, Armenıa Prezıdenti elimizdiń jahandyq úderisterdegi rólin atap ótip, Qazaqstannyń basty jetistikteriniń biri – ultaralyq jáne konfesıaaralyq kelisimdi atady.

Armen Sarkısán atap ótkendeı, Qazaqstan – Eýrazıalyq ıdeıanyń negizin qalaýshy jáne Ortalyq Azıadaǵy ǵana emes, Eýrazıalyq keńistiktegi saıası ortalyqqa aınalǵan memleket.

• Qazaqstan – Tuńǵysh Prezıdent Nursultan Nazarbaev negizin qalaǵan, al búginde Memleket Basshysy Qasym-Jomart Toqaev dástúrli túrde jalǵastyryp kele jatqan Ortalyq Azıada ǵana emes, jalpy óńirde bolyp jatqan barlyq úderisterdiń belsendi qatysýshysy bolyp tabylatyn el, - dedi Armen Sarkısán.

Qazaqstan-Armán yntymaqtastyǵy týraly aıta kele, Armenıa Prezıdenti Qazaqstandy UQSHU, EAEO jáne basqa da halyqaralyq uıymdardaǵy jaqyn seriktes el dep atady. Bul rette, Armen Sarkısán odan ári ózara is-qımyl úshin, onyń ishinde parlamentaralyq baılanystyń mańyzdylyǵyn da atap ótti.

Nurlan Nyǵmatýlın saıası júıeni reformalaý, azamattyq qoǵamdy damytý jáne Memleket Basshysynyń bastamasy boıynsha otandyq zańnamaǵa engizilgen ózgerister týraly aıtty.  Onyń ishinde, saıası partıalardyń Parlamentke ótý shegin tómendetý, saılaý búletenderine "Barlyǵyna qarsy" baǵanyn engizý bekitilgen "Qazaqstan Respýblıkasyndaǵy saılaý týraly" Zańǵa engizilgen ózgerister.

Sonymen qatar, Májilis Tóraǵasy Qazaqstan Armenıamen jan-jaqty qarym-qatynastardy damytýǵa zor mán beretinin jáne Ońtústik Kavkaz óńirindegi senimdi seriktes memleket ekenin atap ótip, armándyq áriptesterimen TMD Parlamentaralyq Assambleıasy men EQYU jáne UQSHU Parlamenttik assambleıalary jáne basqa da birlestikter alańynda tyǵyz ózara is-qımyl ornyqqanyna nazar aýdardy.

Nurlan Nyǵmatýlın zań shyǵarý jumysynda tájirıbe almasý jáne Qazaqstan men Armenıa arasyndaǵy seriktestikti nyǵaıtý maqsatynda armán parlamentshilerimen Palata komıtetteri men yntymaqtastyq toptary deńgeıinde baılanystardy jandandyrýǵa nıetti ekenin aıtty.