Almatyda mas júrgizýshi aıaldamada turǵan úsh jaıaý júrginshini qaǵyp ketti. Bul týraly Almaty qalalyq polısıa departamenti habarlady.

Oqıǵa 5 maýsym kúni saǵat 20:20 shamasynda bolǵan.

– Alkogól jáne esirtki qoldanǵan 1997 jylǵy júrgizýshi "Vaz 21099" kóligimen Raıymbek dańǵylymen batys baǵytta kele jatqan. Ol aıaldama kesheniniń janynda turǵan jaıaý júrginshiler tobyn qaǵyp ketti. Olardyń úsheýi túrli dene jaraqatyn alyp, qalanyń medısına mekemelerine jetkizildi, – dep habarlady Almaty qalalyq polısıa departamenti basshysynyń orynbasary, polısıa podpolkovnıgi Rýstam Ábdirahmanov.

Atalǵan derek boıynsha qylmystyq kodekstiń 345-1-baby 2-bóligi ("Alkogóldik, esirtkilik jáne (nemese) ýytqumarlyq masań kúıde kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy") boıynsha sotqa deıingi tergeýdi bastady.

Kúdikti ýaqytsha ustaý abaqtysyna qamaldy.