Prezıdent Qasym-Jomart Toqaev premer-mınıstr Asqar Mamındi qabyldady. Úkimet basshysy Toqaevqa bıylǵy qańtar-mamyr aılaryndaǵy áleýmettik-ekonomıkalyq damý qorytyndylary men eldegi sanıtarlyq-epıdemıologıalyq ahýaldy aıtty. Bul týraly Aqorda saıty habarlady.
Saıt málimetinshe, úkimet basshysy eldegi sanıtarlyq-epıdemıologıalyq ahýaldyń jaqsarǵanyn aıtyp, Covid-19 indetiniń taralýy boıynsha Qazaqstan "sary" aımaqtan "jasyl" aımaqqa ótkenin jetkizgen. Bir apta ishinde indet juqtyrý deńgeıi 30 paıyzǵa azaıyp, koronavırýstyń taralý ındeksi 0,84-ke deıin tómendegen. Juqpaly aýrýlar bólimderiniń 24 paıyzynda, jansaqtaý bólimderiniń 21 paıyzynda naýqastar em qabyldap jatyr.
Nur-Sultan qalasy "qyzyl" aımaqta, Almaty qalasy, Atyraý, Pavlodar, Batys Qazaqstan, Aqmola jáne Qaraǵandy oblystary "sary" aımaqta. Qalǵan 10 oblys – "jasyl" aımaqta.
Qazirgi tańda 2,4 mln adam ekpeniń birinshi komponentin aldy, 1,3 mıllıonǵa jýyq adamǵa ekpeniń ekinshi komponenti salynǵan.
Memleket basshysy turǵyndarǵa vaksına salý qarqynyn báseńdetpeýdiń jáne epıdemıaǵa qarsy sharalardy jalǵastyrýdyń mańyzdy ekenin atap ótken.
Kezdesý qorytyndysy boıynsha prezıdent áleýmettik mańyzy bar azyq-túlik taýarlarynyń baǵasyn ustap turý, qurylys materıaldarynyń baǵasyn retteý, syrtqy jáne ishki ınvestısıa kólemin arttyrý, óńdeý sektoryn damytyp, ósimin qamtamasyz etý arqyly ekonomıkanyń qurylymdaryn ártaraptandyrý jónindegi sharalardy júzege asyrýǵa basa mán berýdi tapsyrdy.
