«Men sizderdi súıemin, men Madrıdti súıemin, men Ispanıany súıemin. Barlyǵy úshin rahmet sizderge. Bul meniń ómirim úshin óte mańyzdy». Bul Sırıadan qashqan bosqyn áke, fýtbol bapkeri Osama Abdýl Mohsannyń eýropalyqtarǵa aıtqan rızashylyq sózderi.
Esterińizde me? Jaqynda balaly bosqyndy aıaǵynan shalyp qulatqan vengrlik jýrnalıs týraly álemdik buqaralyq aqparat quraldary jarysa jazǵan bolatyn.
Venrıanyń memlekettik «N1TV» telearnasynyń operatory Petro Laslo balasymen qashyp bara jatqan bosqynnyń aıaǵynan shalyp qulatqan jáne bosqyndardy teýip júrgen vıdeosyn áleýmettik jelige jarıalaǵany úshin qyzmetinen qýylǵan edi. Áleýmettik jelige taralǵan vıdeodan kógildir jeıdedegi operator polısıadan qashyp bara jatqan bosqyndy balasymen qosa shalyp qulatqany anyq kórsetilgen. Al qolyna kishkene balasyn kótergen er azamat «bala, bala»,-dep janushyra daýystaǵany et júregimizdi syzdatqany ótirik emes. Oqıǵa Vengrıanyń ońtústiginde ornalasqan Reske bosqyndar lagerinde bolǵan edi.
Álemdik BAQ-tyń jáne Eýropalyq odaqtyń nazaryn aýdarǵan bul oqıǵaǵa qatysty áleýmettik ortada qyzý pikir-talas ornaǵan. Kópshilik qaýym onsyz da bas saýǵalap bara jatqan bosqyndardy teýip júrgen jýrnalıs qyzdy aǵash esekke otyrǵyzyp qoıyp, sybap bergeni de ras.
«N1TV» arnasynyń bas redaktory da, «Bizdiń áriptesimiz búgin ózin ǵana emes, bizdi de masqaralady. Ózin laıyqty kórsete almady»,-degen bolatyn.
Osy oqıǵadan keıin Sırıadan qashqan balaly bosqyn ákeniń buryn tanymal fýtbol bapkeri bolǵandyǵy anyqtalǵan. Al Ispanıadaǵy fýtbol bapkerlerin oqytatyn ulttyq ortalyqtyń ókili Mıgel Anhel Galan sırıalyq Osama Abdýl Mohsannyń oqıǵasyna beı-jaılyq tanytpaǵan. Tipti, biraz kún buryn keleshegi bulyńǵyr bolyp turǵan Osama Abdýl Mohsanǵa Ispanıadaǵy fýtbol klýbyna bapker bolýǵa usynys ta bildirgen.
Mıgel Anhel Galan, Ispanıadaǵy fýtbol bapkerlerin oqytatyn ulttyq ortalyqtyń ókili:
-Mohsen men onyń eki uly Sırıadan Eýropaǵa deıin aýyr da qıyn joldy júrip ótip, mine Madrıdke keldi. Biz de munda Mohsan men onyń otbasyna jyly qushaǵymyzdy ashamyz. Eýropa odaǵy saıasatkerleri men bizdiń bılik bosqyndarǵa járdemdesýi kerek. Olar osy jerde jaqsy jumys taýyp, azamattyq alýlaryna kómektesýimiz kerek. Biz bul adamdarǵa kómek qolymyzdy sozýǵa mindettimiz.
Túıin 1: Dál osy Mohsen men onyń otbasynyń taǵdary áleýmettik jeliniń arqasynda álemdik BAQ-tyń nazaryna ilikti. Áýelde áleýmettik jelilerde bala qushaqtaǵan er azamattyń omaqasa qulaǵan vıdeosy taraldy. Keıin ony vengr jýrnalısiniń shalyp qulatqany belgili boldy. Iá, Mohsen de myńdaǵan bosqynnyń qatarynda Vengrıa shekarasyn basyp ótpek bolyp, polısıadan qashyp kele jatqan edi.
Eger de sol jýrnalıs, Petro Laslo, sırıalyq Mohsenniń aıaǵynan shalyp jáne teýip qulatpaǵan bolsa, ol da myndaǵan bosqynnyń biri bolyp qala berer ma edi?
Endi Mohsen úshin bunyń barlyǵy artta qaldy. Jańa jumys tapty. Tipti jergilikti bılik Mohsenge jáne onyń otbasyna úı berýge ýáde etken de.
Túıin 2: «Tepkenniń» barlyǵy jaman bolmaıdy eken. Ras aıtamyn. Jaqynda qazaqstandyq sheneýniktiń balasy da satýshy qyzdy kókreginen teýip qulatqan edi ǵoı. Kim bilsin munyń aıaǵy qalaı bolady eken?..
Nurgeldi Ábdiǵanıuly
