11-synyp túlekterine arnalǵan atestattardy tapsyrý saltanaty 12-14 maýsym aralyǵynda ashyq alańda ótedi. Bul týraly bilim jáne​ ǵylym mınıstri Asqat Aımaǵambetov aıtty.

Vedomstvo basshysy atap ótkendeı, mektepter sanıtarlyq qaýipsizdik sharalaryn, maska rejımin qatań saqtaýǵa tıis. Sondaı-aq saltanatty sharaǵa qatysýshylar keminde 1-1,5 metr ara qashyqtyqty qamtamasyz etip, ata-analar men zańdy ókilderdiń bireýi ǵana kelýi kerek.

Bilim jáne ǵylym mınıstrligi atestat tapsyrý saltanatyn ár synyp úshin bólek ótkizýdi usynady.

Atestattardy tapsyrý rásimi saǵat 10.00-de bastalady jáne árbir mektep bitirip jatqan synypqa 40 mınýt ýaqyt beriledi. İs-sharalar arasyndaǵy ınterval 20-30 mınýttan kem bolmaýy kerek.

– Biz mektep túlekteriniń bir-birimen qaýyshyp, muǵalimderiniń izgi tilekterin tyńdaýǵa jáne mektepti bitirý týraly atestattardy saltanatty túrde alýǵa degen tilekterine túsinistikpen qaradyq. Alaıda, endi árbir mektep qaýipsizdik sharalaryn saqtaý máselesin óz baqylaýynda ustaýy tıis. Sondaı-aq is-sharalardy ótkizý úshin aqsha jınaýǵa, meıramhanalarda, dámhanalarda jáne basqa da kóńil kóterý mekemelerinde bitirý keshterin uıymdastyrýǵa jol berilmeıtinin taǵy da eske salǵym keledi, – dep atap ótti Aımaǵambetov.