Densaýlyq saqtaý mınıstrligi bir táýlikte 967 adamnan koronavırýs, 11 adamnan pnevmonıa anyqtalǵanyn, 11 adam koronavırýstan, 8 adam pnevmonıadan kóz jumǵanyn habarlady.

Elde koronavırýs juqtyrǵandardyń jalpy resmı sany 402 239-ge jetken. Onyń ishinde 4171 adam qaıtys bolǵan. 2020 jylǵy 1 tamyzdan beri júrgizilip kele jatqan statısıkaǵa saı, 56 231 adam indetke shaldyǵyp, 3415 adam qaıtys bolǵan.

14 maýsymdaǵy málimet boıynsha, 21 537 adam koronavırýs ınfeksıasynan emdelip jatyr. Olardyń ishinde 7 075 pasıent stasıonarda, 14 462 naýqas ambýlatorıalyq deńgeıde em qabyldaýda.

İndetke shaldyqqandar arasynda 512 adamnyń jaǵdaıy aýyr, 113 pasıenttiń jaǵdaıy óte aýyr, 70 naýqas ÓJJ apparatynda jatyr.

DSM mamyrda pnevmonıadan qaıtys bolǵandardyń sanyn kúrt kóbeıtip, oǵan 3 myńǵa jýyq adam qosqan. Mınıstrlik bul sandardyń ólgender statısıkasyna der kezinde  qosylmaýyn derekterdiń qaǵazda bolyp kelýimen, elektrondyq bazaǵa kesh kirgizilýimen túsindirgen.

Qazaqstanda koronavırýs statısıkasyna baılanysty birneshe ret daý týǵan. Bastapqyda pnevmonıa statısıkasy múlde júrgizilmedi. Dúnıejúzilik densaýlyq saqtaý uıymynyń mamandary men álemniń birneshe eliniń jáne Qazaqstannyń baspasóz quraldary máselege nazar aýdarǵan soń 2020 jylǵy 1 tamyzdan bastap mınıstrlik pnevmonıa statısıkasyn júrgize bastady.

Qoǵamda bılik koronavırýstan qaıtys bolǵandar statısıkasyn ádeıi tómendetip kórsetip otyr degen pikir bar. Statısıka komıteti jarıalaǵan derekke saı, 2020 jylǵy mamyr-shilde aralyǵynda aldyńǵy jyldarǵa qaraǵanda ólim jaǵdaıy 30 myńǵa artyq tirkelgen.

DSM koronavırýs juqtyryp qaıtys bolǵan keı azamattardyń statısıkaǵa enbeýin olardyń janama syrqattardan kóz jumǵanymen túsindiredi.