Almatyda polısıa qyzmetkeri jaıaý júrginshini qaǵyp ketti. Bul týraly qalalyq polısıa departamentiniń baspasóz qyzmeti habarlady.

Oqıǵa 14 maýsym saǵat 7:00-de Almatynyń Alataý aýdanynda bolǵan. Saldarynan jaıaý júrginshi oqıǵa ornynda kóz jumdy.

"Polısıa qyzmetkeri Hyundai Elantra markaly qyzmettik kólikpen Ótemisuly kóshesimen ońtústikke qaraı júrip kele jatqan. Kútpegen jerden aldyndaǵy kólik manevr jasaı bastaıdy. Polıseı onymen soqtyǵysyp qalmas úshin kilt burylyp, jol jıegine shyǵyp ketken. Sol jerde jaıaý kele jatqan áıeldi qaǵyp ketti. Sosyn "Gazel" kóligine soǵyldy" delingen departament taratqan habarlamada.

Qazir atalǵan oqıǵa boıynsha qylmystyq kodekstiń 345-baby, 3-tarmaǵy (Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy abaısyzda adam ólimine ákep soǵýy) boıynsha sotqa deıingi tergeý bastaldy.

Eger de polısıa qyzmetkeriniń kinási dáleldense, bes jylǵa deıin bas bostandyǵynan aıyrylady.