Saıt málimetinshe, agenttik tóraǵasy memleket basshysyna "kóleńkeli" ekonomıka deńgeıin qysqartý baǵytynda júrgizilip jatqan jumystar týraly málimet bergen. Atalǵan mindet júıeli ári keshendi aldyn alý sharalaryn ázirleý jáne ótkizý arqyly júzege asyrylýda.

Janat Elımanov Qasym-Jomart Toqaevqa  búginge deıin 2,8 trıllıon teńge kóleminde jalǵan shot-faktýralar jazyp berýmen aınalysqan 87 qylmystyq toptyń joly kesilgenin baıandady.

"Qabyldanǵan sharalardyń nátıjesinde zańdy tulǵalardyń qolma-qol aqshaǵa aınaldyrǵan qarjy kólemin 24 paıyzǵa azaıtý múmkin boldy. Budan bólek jasyryn jumys istegen 10 sehtyń qyzmeti toqtatylyp, esepte joq 800 myń shólmekten astam alkogól ónimi tárkilendi. Sondaı-aq 96 zańsyz oıyn mekemesi joıylyp, zańsyz aınalymnan 1200-den astam oıyn avtomaty, termınal men poker ústeli alyndy. Munaı jáne munaı ónimderi boıynsha 40 zańsyz aınalym  deregi anyqtaldy" delingen habarlamada.

Toqaev "Aıqyn ekonomıka" ulttyq jobasyn iske qosý týraly bastamany qoldady. Qarjy salasynyń ashyqtyǵyn qamtamasyz etý, shaǵyn jáne orta bıznestiń "kóleńkeli sektordan" shyǵýyn yntalandyrý atalǵan bastamanyń strategıalyq basymdyǵy bolyp tabylady.

Agenttik tóraǵasynyń aıtýynsha, 2021-2022 jyldary Qazaqstannyń jylystatýǵa qarsy júıesi qylmystyq jolmen túsken tabystardy zańdastyrýǵa jáne terorızmdi qarjylandyrýǵa qarsy is-qımyl salasyndaǵy FATF (Aqshany jylystatýǵa qarsy kúrestiń qarjylyq sharalaryn ázirleý toby) standarttarynyń saqtalýy boıynsha ózara baǵalaýdan ótýi tıis.

Prezıdent agenttiktiń atalǵan sharaǵa qatysty júrgizip jatqan daıyndyq jumystarynyń mańyzdy ekenin atap ótti jáne kezdesý qorytyndysy boıynsha birqatar naqty tapsyrma berdi.