Májilistiń jalpy otyrysynda depýtat Darıǵa Nazarbaeva premer-mınıstr Asqar Mamınge eki birdeı depýtattyq saýal joldady.

Nazarbaeva alǵashqy saýalynda jekemenshik balabaqsha mamandarynyń jalaqysyna qatysty másele kóterdi.

Depýtattar buǵan deıin mektepke deıingi jekemenshik bilim berý uıymdaryna memlekettik tapsyryspen qarjy bólý máselesine nazar aýdarǵan. Sol kezde úkimet jekemenshik balabaqshalardy qoldaý maqsatynda salyq tóleýden bosatý, jalaqyǵa ústemaqy tóleý sıaqty tıimdi sharalardyń qolǵa alynǵanyn málimdegen. Al bıyl keıbir oblystar respýblıkalyq búdjetten qosymsha qarajat bólýdi suraǵan.

– Alaıda respýblıkalyq búdjetten tıisti nysanaly transfertter bólingen joq. Joǵaryda aıtylǵandardyń negizinde kelesi suraqtarǵa jaýap berýińizdi suraımyn. Nelikten bul qarjylandyrý 2021 jylǵa arnalǵan respýblıkalyq búdjetti naqtylaý kezinde eskerilmedi? Bıyl Túrkistan jáne Almaty oblystaryna qosymsha qarajat bólý kózdelip otyr ma?, – dedi depýtat saýalynda. 

Sondaı-aq Nazarbaeva sheteldik ınvestorlarmen jumys isteý tetikterin jetildirý qajettiligi máselesine de nazar aýdardy. Aıtýynsha, kez kelgen memleket ınvestısıalardy barynsha kóp tartýǵa múddeli. Alaıda jaýapsyz ınvestorlar osy jaǵdaıdy paıdalanyp, enshiles kompanıalardan taýarlardy, jumystar men kórsetiletin qyzmetterdi joǵary baǵamen satyp alý arqyly ınvestısıalaý kólemin jasandy túrde kóp etip kórsete salady.

Osylaısha, depýtat 2017 jyldaǵy Anatolıı Statıdiń isin mysal retinde keltirdi.

– 2017 jylǵy 6 maýsymda Aǵylshyn soty, «Anatolıı Statı jalǵan aǵylshyn Perkwood kompanıasyn paıdalana otyryp, alaıaqtyq jolmen Qazaqstan Respýblıkasynda gaz óńdeý zaýytyn salý úshin jetkizilgen jabdyqtyń qunyn 100 mıllıon AQSH dollarynan astam somaǵa  asyryp jibergenin" anyqtady. Jalǵan basqarý qyzmetterin  kórsetip, 44 mıllıon AQSH dollary kóleminde syıaqy tóleý jáne joq  jabdyqtar úshin 72 mıllıon AQSH dollary kóleminde tólemder sıaqty basqa da alaıaqtyq áreketterin kórsetýge bolady, – deıdi ol.

Ol tórelikke júgingen kezde jaýapsyz ınvestorlar jumys baǵdarlamalarynda jazylǵan ózderiniń jalǵan ınvestısıalary úshin sotqa júginetinin de atap ótti. Tórelik ınvestordyń paıdasyna sheshim shyǵarǵan jaǵdaıda, jasandy kóterińki somalar elge boryshtyq aýyrtpalyq túsiredi, memleket aktıvteri úshin ózge de  teris táýekelder jasaıtynyn jetkizdi.

Depýtat ınvestorlarmen jumysty uıymdastyrý kezinde shyǵyndardy jasandy arttyrýǵa jol bermeý maqsatynda ınvestısıalyq mindettemelerdi (jumys baǵdarlamalaryn) oryndaýdyń naqty jáne ashyq tetigin belgilep, ony baqylaýda ustaýdy usyndy.