Májilis depýtaty Serik Erýbaev premer-mınıstrdiń orynbasary Eraly Toǵjanovqa bilim mınıstrligine qaıta testileýdi qysqa ýaqyt ishinde uıymdastyrýdy surap, depýtattyq saýal joldady. 

Depýtat sóz basynda bıyl mektep túlekteri ulttyq biryńǵaı testini jańa formatta tapsyryp jatqanyn, túlekter qajet bolǵan jaǵdaıda testti qaıta tapsyrýǵa múmkindik alǵanyn atap ótti.

Osyǵan baılanysty, ótken oqý jyly qashyqtan oqytý jáne stresstik jaǵdaı túlekter kórsetkishteriniń nasharlaýyna yqpal etkenin aıtty.

– Ótken jyldardyń statısıkasyn bárimiz bilemiz, qansha túlek stresske tótep bere almaı, tótenshe sharalarǵa bardy. Qudaı saqtasyn odan. 

Sonymen birge, bul balalar qylmysker emes jáne qoǵam aldynda eshteńege kináli emes, laıyqty bilim alýǵa jáne ómirde jetistikke jetýge degen nıetteri bar. Biz jastarymyzdy azaptap emes, tabandylyqpen jigerlendirgen durys bolar edi.

Úlken bıikterge jetken tabysty memleket qaıratkerleri men kásipkerlerdiń kóptegen mysaldaryn bilemiz. Mysaly, álemdegi eń baı adamdardyń biri Alı baba Dúnıejúzilik saýda ınternet júıesin jasaýshy Djek Ma - 10 ret ýnıversıtetke túsý emtıhandaryn tapsyra almapty.

Al uly ǵalym, salastyrmalyq teorıasynyń avtory Albert Eınshteın, mektepte oqyǵanda topas oqýshy dep esepteletin.

Iá, keıbir balalardyń talanttaryn kópshilik júre bara baıqaıdy. Alysqa barmaı-aq, óz maqtanyshymyz Dımash Qudaıbergen soǵan soǵan aıqyn dálel.

Sondyqtan bizdiń túlekterimizdiń aldynda esik jabýdyń qajeti joq. Olardyń arasynan bolashaq jetekshiler, talanttar, ne jaı laıyqty azamattar shyǵýy múmkin, – deıdi ol.

Depýtattyń sózinshe, UBT-ny qaıta tapsyrýdyń keshiktirilýi eshteńemen negizdelmegen jáne aıqyn táýekelderge alyp keledi.

Osyǵan baılanysty, úkimet basshysynyń orynbasarynan shuǵyl túrde bilim mınıstrligine qaıta testileýdi qysqa ýaqyt ishinde uıymdastyrýdy jáne osy máseleni jeke baqylaýǵa alýdy surady.