Bilim jáne ǵylym mınıstrligi magıstratýra men doktorantýraǵa túsý erejelerin jarıalady.

Magıstratýranyń bilim berý baǵdarlamalary boıynsha oqýǵa túsý úshin halyqaralyq sertıfıkattardy usynýǵa nemese keshendi testileý (KT) barysynda shet tilinen test tapsyrýǵa bolady.

Doktorantýranyń bilim berý baǵdarlamalary boıynsha oqýǵa túsý úshin shet tilin meńgergendigin rastaıtyn sertıfıkat mindetti.

Sonymen qatar Duolingo English Test 2021-2022 oqý jylyna magıstratýra men doktorantýraǵa túsý kezinde shet tilin meńgergenin rastaıtyn halyqaralyq sertıfıkattar tiziminen shyǵarylady.

Magıstratýraǵa túsýge arnalǵan keshendi testileýge qatysý úshin tirkeý 18 maýsym kúni bastalady.

Tirkeý BǴM Ulttyq testileý ortalyǵynyń app.testcenter.kz saıtynda júrgiziledi. Emtıhandar 20 shildeden bastalyp, 10 tamyzǵa deıin jalǵasady.

Magıstratýraǵa túsý formatynda bıyl eshqandaı ózgeris joq. Testileý nátıjelerimen kelispegen jaǵdaıda testilenýshi KT aıaqtalǵannan keıin 30 mınýttyń ishinde apelásıaǵa ótinish bere alady.

– Magıstratýraǵa túsýge arnalǵan testileý 3 bólimnen turady: shet tili boıynsha test, oqýǵa daıyndyǵyn anyqtaýǵa arnalǵan jáne bilim berý baǵdarlamalary tobynyń beıini boıynsha test. Shet tilin meńgerýdiń jalpy halyqaralyq quzyretterine (standarttaryna) sáıkes shet tilin meńgergenin rastaıtyn bir halyqaralyq sertıfıkaty bar magıstratýraǵa túsýshiler shet tili boıynsha keshendi testileýden bosatylady, – dedi BǴM Joǵary jáne joǵary oqý ornynan keıingi bilim departamentiniń dırektory Ádilet Toıbaev.

2021-2022 oqý jylyna magıstratýraǵa 13 263 grant bólingen. Bıyl magıstratýra men doktorantýraǵa túsý úshin shekti bal – 75, oqýǵa aqyly negizde túsý – 50 bal.

Doktorantýraǵa ótinish qabyldaý 3 shildede bastalyp, 3 tamyzǵa deıin jalǵasady.

Doktorantýraǵa túsý emtıhandary 4-20 tamyz aralyǵynda ótedi. Osy rette doktorantýraǵa túsý úshin bir ǵana joǵary oqý ornyn jáne bir bilim berý baǵdarlamalarynyń tobyn tańdaýǵa bolady.

– Doktorantýraǵa túsý úshin ótinishter joǵary oqý oryndarynyń qabyldaý komısıalary arqyly qabyldanady. Budan ári ótinishter Ulttyq testileý ortalyǵynyń aqparattyq júıesinde tirkeledi. Oqýǵa túsýshiler óńirlik testileý ortalyqtarynda túsý emtıhandaryn tapsyrady. Mádenıet jáne sport mınıstrligi men Densaýlyq saqtaý mınıstrligine vedimistik baǵynysty joǵary oqý oryndaryna túsýshiler emtıhandardy óz joǵary oqý oryndarynyń bazasynda tapsyrady, – Á. Toıbaev.

2021-2022 oqý jylyna PhD mamandaryn daıarlaýǵa arnalǵan memlekettik grant sany 1890 grantty quraıdy.