Elordada kópten kútken jyl premeralarynyń biri – bolashaqtyqtar qazaq tiline dýblájdaǵan Pixar stýdıasynyń «Lýka» anımasıalyq fılminiń aldyn ala kórsetilimi ótti.

Osydan týra 10 jyl buryn 2011 jyldyń maýsym aıynda Elbasy, Tuńǵysh Prezıdent Nursultan Nazarbaevtyń tikeleı qoldaýymen alǵash ret qazaqstandyq kınoprokatqa aǵylshyn tilinen tikeleı qazaq tiline dýblájdalǵan Disney stýdıasynyń «Kólikter 2» anımasıalyq fılmi shyqty.

Sodan beri elimizdiń kınoteatrlarynda Disney, Pixar, Marvel, Sony Pictures jáne t.b. álemniń jetekshi kınostýdıalarynyń qazaq tiline dýblájdalǵan 35 fılmi kórsetildi. Jobanyń arqasynda qazaq tili dýblájda túrik tilinen keıingi ekinshi túrki tili jáne «Walt Disney» kompanıasynyń tarıhynda 39-shy til boldy. 100-den astam otandyq akter «Walt Disney Pictures»-tiń daýystyq bazasyna endi.

«Lýka» múltfılmi – «Nur Otan» partıasynyń, sondaı-aq janashyr demeýshiler men mesenattardyń qoldaýymen júzege asyrylyp jatqan «Ózińnen basta» jobasy aıasynda «Bolashaq» korporatıvtik qory men «Meloman» kompanıasynyń bastamasymen dýblájdalǵan 37-shi kartına. Jobanyń ıdeıalyq yntalandyrýshysy – «Bolashaq» qory Qamqorshylyq keńesiniń qurmetti múshesi, «Nur Otan» partıasy Tóraǵasynyń Birinshi orynbasary Baýyrjan Baıbek.

«Bıyl «Bolashaq» qory men «Ózińnen basta» fılmderdi dýblájdaý jobasyna 10 jyl toldy. Atalǵan joba árbir qazaqstandyqtyń ana tilindegi joǵary sapaly sheteldik kınokontentke qoljetimdilik quqyǵyn iske asyrýǵa septigin tıgizýde. Sońǵy jyldary biz joba balalar men eresekterge arnalǵan memlekettik tilde sapaly mýltımedıalyq kontentti qurý boıynsha ulttyq saıasattyń bir bóligi bolý úshin qarqyndy jumys istep jatyrmyz», - dedi «Bolashaq» qory qamqorshylyq keńesiniń tóraıymy Dınara Shaıjúnisova.

Ol qordyń kınematografıa máseleleri jónindegi zań jobasyn talqylaıtyn Jumys tobynyń quramyna kiretinin atap ótti. Bul rette anımasıalyq fılmder jáne otbasymen kórýge arnalǵan fılmderdi dýblájdaýdy qamtamasyz etýde memlekettik qoldaý sharalaryn keńeıtý – «Nur Otan» partıasynyń saılaýaldy baǵdarlamasyn iske asyrý jónindegi bekitilgen Jol kartasynyń ındıkatorlarynyń biri.

«Biz balalar kontenti men otbasymen kórýge arnalǵan sheteldik fılmderdi dýblájdaýǵa memlekettik qarjylyq qoldaý kórsetý, praım-taım seanstarynyń ýaqytyn retteý, memlekettik jáne ózge tilderdegi kınoseanstardyń úlesterin bólý, otbasymen kórýge arnalǵan fılmderdiń qazaq tilindegi dýblájyn prokatqa shyǵaratyn kınoteatrlar úshin salyq preferensıalaryn engizý máselelerine qatysty birqatar usynystar engizdik. Mádenıet jáne sport mınıstrliginiń ýákiletti organ retindegi mindeti – olardy iske asyrý boıynsha tolyqqandy jaýapkershilik alý», - dep tolyqtyrdy Dınara Shaıjúnisova.

Jalpy, «Nur Otan» baspasóz qyzmetiniń aqparatyna súıensek, bıleýshi partıa óziniń saılaýaldy ýádelerin iske asyrý aıasynda memlekettik tildiń barlyq salada qoldanylýyn keńeıtýge, qazaq tilinde oqytatyn mektepter men balabaqshalardy kóbeıtýge, sondaı-aq dástúrli mádenıet pen ulttyq sport túrlerin qoldaýdy jalǵastyrýǵa nıetti.

Aldyn ala kórsetilimge «Bolashaq» Qaýymdastyǵy Keńesiniń qurmetti múshesi, Nur-sultan qalasynyń ákimi Altaı Kólginov te qatysty.

«Ózderińiz biletindeı, Elbasy memlekettik tildi damytý úshin, Táýelsizdiktiń alǵashqy jyldarynan bastap eńbek etip keledi. Prezıdent ana tilimizge erekshe kóńil aýdaryp, memlekettik dárejede qoldaý bildirip keledi. Sondyqtan «Bolashaq» Qorynyń «Ózińnen basta» jobasy — qazaq tiliniń damýyna qosqan zor úlesi. Osy maqsatta memlekettik búdjetten qarajat bólingen joq, munyń bári demeýshilerdiń arqasynda júzege asty. Biz osy oraıda olarǵa rızashylyǵymyzdy bildiremiz», - dedi Altaı Kólginov.

«Lýka» fılmine kastıngke Nur-sultan qalasynan 32 akter qatysty. Mamandardyń aıtýynsha, dýblájdaý kezinde aǵylshyn tilindegi mátin qazaq tiline aýdarylyp qana qoımaıdy. Onda tilimizge tán sózder qoldanylyp, ázilder sózbe-sóz aýdarylmaı, ulttyq mádenıettiń erekshelikterin eskere otyryp aýdarylǵan. Mysaly, «Lýka» fılminde maǵynany neǵurlym aıqyn jetkizý úshin «Otpen oınap júrmiz», «Aýzyńa maı, astyńa taı» degen sıaqty taǵy da basqa qazaq frazeologızmderi qoldanyldy.

Fılmniń dýbláj rejıseri Nazerke Lespekqyzynyń pikirinshe, mundaı málimetter fılmdi balalar úshin ǵana emes, eresekter úshin de túsinikti ári kúlkili etedi.

«Dýbláj jumysynyń qıyndyǵy akterlik sheberlikten kem túspeıdi. Onyń ústine, kishkentaı bólmede, eshqandaı kórermensiz, olardyń qoldaýy men qoshemetinsiz oınaý ońaı emes. Akterlik kásipti endi ǵana meńgerip kele jatqan balalarǵa erekshe qıyn boldy», - dep atap ótti rejıser.

«Lýka» - ıtalándyq jas rejıser, «Oskar» syılyǵyna úmitker Enrıko Kasarostyń debúttik taspasy. Kartına álemge áıgili kompozıtor Ennıo Morrıkondy eske alýǵa arnalǵan. Italándyq Rıveranyń eń jarqyn ásem peızajdary, ulttyq mýzykasy, barlyq keıipkerlerdiń jigerli de qyzýqandy minez-qulqy eshkimdi beıjaı qaldyrmaıdy.

Qazaqstan kınoteatrlarynda fılm búgin, 17 maýsymda qazaq jáne orys tilderinde shyǵady. Al sodan soń «Lýka» ivi jáne Megogo onlaın-kınoteatrlarynda qazaq tilinde kórýge bolatyn sheteldik fılmder toptamasyn tolyqtyrady.

Aıta ketý kerek, «Lýka» – bul «BI Group» qurylys holdıńiniń demeýshiligimen dýblájdalǵan 12-shi fılm.

Qazaq tilindegi treıler:
https://www.youtube.com/watch?v=wVoAWegl7ws.