Toqaev ishki gaz naryǵyndaǵy baǵa belgileý isin jetildirýdi negizgi máselelerdiń biri retinde atap ótti. Onyń aıtýynsha, óńirlerdi jappaı gazben qamtamasyz etý gazdy tutyný kóleminiń artýyna ákep soǵady. Sońǵy bes jylda ishki naryqtaǵy gaz 40 paıyzǵa, ıaǵnı 12 den 17 mıllıard tekshe metrge deıin artqan. Osy rette Qazaqstandaǵy gazdyń baǵasy TMD elderiniń ishinde eń tómengi deńgeıde bolyp otyr. Bul týraly prezıdent Qasym-Jomart Toqaev gaz salasyn damytý jónindegi keńeste málimdedi.

 – Buǵan deıin óńirler boıynsha gaz tarıfyn retteý jáne halyqty qol jetimdi gazben qamtamasyz etý jóninde tapsyrma berdim. Osy baǵyttaǵy jumystardy jandandyrý kerek. Bir sózben aıtqanda, halyqtyń áleýmettik jaǵdaıy tómen toptaryn, sondaı-aq, jumysy gaz baǵasyna tikeleı baılanysty ekonomıka salalaryn  júıeli túrde qorǵaý maqsatymen baǵa belgileýdiń túsinikti ári jańa ashyq modeli qajet. Úkimetke 1 qyrkúıekke deıin atalǵan máseleniń ádis-tásilderin ázirleýdi tapsyramyn, – dedi Qasym-Jomart Toqaev.

Prezıdent gaz tasymaldaý júıesin jańǵyrtý úshin úkimet pen Qorǵa, eksporttan, tipti, jekeshelendirýden túsetin tabystardy qosa alǵanda, qosymsha qarjylandyrý kózderin iske qosýdy tapsyrdy.

Onyń aıtýynsha, sońǵy úsh jylda elimiz boıynsha  suıytylǵan munaı gazyn tutyný deńgeıi eki eseden astam ósken.

– Tek Mańǵystaý oblysynda avtokólikterdiń 90 paıyzdan astamynda suıytylǵan gaz paıdalanylady. Óńirdiń negizgi gaz jetkizýshisi Qazaq gaz óńdeý zaýyty bolyp tabylady. Onyń negizgi qural-jabdyqtarynyń 90 paıyzy tozǵan. Zaýyttyń apattyq jaǵdaılarǵa baılanysty toqtap qalýy halyqty gazsyz qaldyrýy múmkin. Osy rette Qazaq gaz óńdeý zaýytynyń bazasynda salynatyn jańa gaz óńdeý zaýytynyń qurylysyn keshiktirý ekonomıkalyq turǵydan ǵana emes, sondaı-aq áleýmettik jaǵynan da qaýip týǵyzady. Úkimetke "Samuryq-Qazyna" qorymen birlesip, atalǵan baǵyttaǵy jumystardy jandandyrýdy tapsyramyn. Jańa zaýyt 2023 jyldan keshikpeı paıdalanýǵa berilýi tıis, – dedi prezıdent.